ފެލިވަރުން މަސް ކިރާ މިންވަރު އިތުރުކޮށްފި
ރާއްޖޭގެ ދެކުނުގެ މަސްވެރިކަން ވެސް ރަނގަޅުވެ، މިފްކޯއިން މަސް ގަންނަ މިންވަރު ކުރިން ކޮންޓްރޯލުކޮށްފައި އޮތް އޮތުން މިއަދު ލުއިކޮށްފިއެވެ.
މިފްކޯއިން މިއަދު ވަނީ، ކޮންޓްރޯލެއް ނެތި ޅ. ފެލިވަރުން މަސް ގަންނަން ފަށައި ގއ. ކޫއްޑޫއަށް މަސްކިރޭ މިންވަރު ވެސް އިތުރުކޮށްފައެވެ.
މިފްކޯގެ މެނޭޖިންގ ޑިރެކްޓަރ އިސްމާއިލް ފައުޒީ މިއަދު "ދެން"އަށް މައުލޫމާތު ދެެއްވަމުން ވިދާޅުވީ މިދިޔަ ހަފްތާގެ ކުރީކޮޅުން ފެށިގެން ދެކުނުގެ މަސްވެރިކަން ރަނގަޅުވެ، އެ ކުންފުނީގެ ފްރީލިންކް ކެޕޭސިޓީއަށް ވުރެ ވެސް އިތުރަށް މަސް ލިބެމުންދާ ކަމަށެވެެ.
"ކިޔުގައި ދޯނި ފަހަރު ތިބުމާ، މަހުގެ ކޮލިޓީއާ އެއްޗެހި ދަށް ވާނެތީ އެކަަމަށް ބަލައިފައި، އަޅުގަނޑުމެންގެ ބޯޓު ފަހަރުގައި ހުރި މަސް ކޫއްޑޫއަށް އަންލޯޑުކޮށްގެން، އެ ހަމަކޮށްގެން ކެރިއަރުތަކަށް ލާން ވަގުތުކޮޅެއް ވެސް ބޭނުންވާތީ، ދެކުނުގެ އަަޅުގަނޑުމެން އިންނާނީ މަސް ކިރޭ މިންވަރު ދުވާލަކު ފަސް ޓަނަށް ހަދައިފައި" އިސްމާއިލް ވިދާޅުވިއެވެ.
މީގެ އިތުރުން އިސްމާއިލް ވިދާޅުވީ އުތުރުގެ މަސްވެރިކަމަށް ބަލައިފައި ފެލިވަރު ބަނދަރުން މަސްކިރޭ މިންވަރު މިހާރު ކޮންޓްރޯލުން ދޫކޮށްފައިވާ ކަމަށެވެ. ކޫއްޑޫ ބަނދަރުން ފަސް ޓަނު މަސް ނަގަމުން އައި އުސޫލު ވެސް ބަދަލުކޮށް، މިއަދުން ފެށިގެން ކޮންމެ ދުވަހަކު ހަޓަނު މަސް ކިރޭނެ ކަމަށް ވެސް އިސްމާއިލް ވިދާޅުވިއެވެ.
