މާލޭގެ އާބާދީގެ 74އިންސައްތަ އުޅެނީ ކުއްޔަށް، އެއް ކޮޓަރި ލިބެނީ 9900 ރުފިޔާއަށް

މާލޭގައި ދިރިއުޅޭ އާބާދީގެ 74 އިންސައްތަ މީހުން އުޅެނީ ގެދޮރު ކުއްޔަށް ނަގައިގެން ކަމަށާއި މިސަރަހައްދުގައި އެވަރޭޖްކޮށް އެއް ކޮޓަރީގެ އެޕާޓްމެންޓެއް ލިބެނީ 9،900 ރުފިޔާއަށްކަމަށް ތަފާސް ހިސާބުތަކުން ދައްކައިފިއެވެ.

Ads by STELCO

ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމްއިން ނެރުނު ހިއުމަން ރައިޓްސް ރިޕޯޓު 2021ގައި ބުނެފައިވާގޮތުން ސެންޓްރަލައިޒްޑް ނިޒާމެއްގެ ދަށުން ގައުމު ކުރިއަރުވައި ތަރައްޤީގެ ގިނަ މަޝްރޫޢުތައް މާލޭގައި ކުރިއަށް ގެންދިއުމުގެ ސަބަބުން ރާއްޖޭގެ އާބާދީގެ 47 އިންސައްތަ ދިރިއުޅެނީ މާލޭގައިކަމާއި މާލެ ތޮއްޖެހިފައިވާކަން ފާހަގަކުރެވުނު ކަމަށެވެ.

އެ ރިޕޯޓުގައި ބުނެފައި ވަނީ މާލެއަށް ދިރިއުޅުން ބަދަލުކުރަން ޖެހޭ މައިގަނޑު ސަބަބުތަކަކީ ތަޢުލީމު ހާސިލް ކުރުމާއި، އާމްދަނީ ހޯދުމާއި ވަޒީފާ އަދާކުރުމަށާއި ޞިއްޙީ ފަރުވާއަށްކަން ދިރާސާއިން ފާހަގަ ކުރެވުނު ކަމަށެވެ. އަދި މާލެއަށް ދިރިއުޅުން ބަދަލުކޮށްފައިވާ ފަރާތްތަކުން ބޯހިޔާވަހިކަން ހޯދަނީ ޕްރައިވެޓް ހައުސިން މައްޗަށް ބަރޯސާވެގެންކަމަށާއި މާލޭގައި ޕްރައިވެޓް ހައުސިންގެ އަގު ބޮޑުކަމަށް ވަނީ ބުނެފައެވެ.

އެގޮތުން މާލޭގެ 74 އިންސައްތަ މީހުން އުޅެނީ ކުއްޔަށެވެ. އަދި ލިބޭ އާމްދަނީއާ ބަލައިފައި ގޭގެއަށް ދައްކަންޖެހޭ ކުލި ބޮޑުކަމާއި ގޭބީސީއަކަށް މަހެއްގެ މައްޗަށް ލިބޭ އާމްދަނީގެ 40 އިންސައްތަ ހަރަދު ކުރަނީ ކުލި ދައްކަން ކަމަށާއި އެހެންކަމުން ޢާއްމު ރައްޔިތުންނަށް ބޯހިޔާވަހިކަން އަތްފޯރާފަށުގައި ނުލިބޭކަން ފާހަގަކުރެވޭކަމަށް އެޗްއާރުސީއެމްއިން ބުންޏެވެ.

މީގެ އިތުރުން ލިބޭ އާމްދަނީއާ އަޅައި ބަލާއިރު އެވަރޭޖްކޮށް ސޯޝަލް ހައުސިންގެ އަގު ބޮޑުކަން ވެސް ފާހަގަކުރެވޭކަމަށް ބުންޏެވެ. މީގެ އިތުރުން މާލެ ސަރަހައްދުގެ ކުލީގެ އަދަދު ދުވަހެއް ދުވަހަކަށް އިތުރުވަމުންދާކަމަށް ރިޕޯޓުގައި ވަނީ ބުނެފައެވެ. އެގޮތުން މާލޭގައި ގޭބީސީއެއްގެ އެވަރޭޖް ކުލި 13،683 ރުފިޔާގައި އުޅޭއިރު އަތޮޅުތެރޭގައި މިއަދަދު އުޅެނީ 2،668 ރުފިޔާގައެވެ.

ގްރޭޓާ މާލެ ސަރަހައްދުގައި އެއްކޮޓަރީގެ އެޕާޓްމެންޓެއް ލިބޭ އެވަރޭޖް އަގަކީ 9،900 ރުފިޔާއެވެ. ދެކޮޓަރީގެ އެޕާޓްމެންޓެއްގެ އަގަކީ 14،388 ރުފިޔާއެވެ. އަތޮޅު ތެރޭގައި މިއަދަދު އުޅެނީ އެވަރޭޖްކޮށް 2،765 ރުފިޔާގައެވެ. ކޮޓަރީގެ އަދަދުތައް އިތުރުވަމުންދާ ވަރަކަށް ކުލި ވެސް ބޮޑުވަމުންދާއިރު ގިނަ ގޭބީސީތަކުގައި ދިރިއުޅޭ މީހުންނަށް ލިބޭ އާމްދަނީއާއި އެމީހުން ކުލީގެ ގޮތުގައި ދައްކާ އަދަދު ދިމާނުވާކަމަށް އެޗްއާރުސީއެމްއިން ވަނީ ފާހަގަކޮށްފައެވެ.

މާލެ ސަރަހައްދުގެ އިތުރުން އަތޮޅު ތެރޭގެ ރަށްތަކުގައި ވެސް ބޯހިޔާވަހިކަމުގެ ދަތިކަން ހުރިކަން ރިޕޯޓުގައި ވަނީ ފާހަގަކޮށްފައެވެ. ސަރުކާރުން ގިނަ ރަށްރަށުގައި ގެދޮރު ބިނާކުރުމަށް ބިން ދޫކުރުން ހުއްޓައިލައިފައިވާ ކަމާއި އެތައް ޢާއިލާއަކުން އެއް ގެއެއްގައި ދިރިއުޅެމުން ދާކަން ފާހަގަކުރެވިފައިވާކަމަށް ރިޕޯޓުގައި ބުންޏެވެ. ސޯޝަލް ހައުސިންގ ސްކީމްގެ ދަށުން ލިބިފައި ހުންނަ ފްލެޓްތަކުގައި ދިރިއުޅެނީ ފްލެޓް ލިބުނު ފަރާތުން ނޫންކަމުގައްޔާއި އެ ތަންތަން ކުއްޔަށް ދީފައިވާކަން ފާހަގަކުރެވޭކަމަށް ވެސް ބުންޏެވެ.

ބޯހިޔާވަހިކަމާ ގުޅޭ ޖުމްލަ 14 މައްސަލައެއް ނިމި ދިޔަ 2021ވަނަ އަހަރު އެޗްއާރުސީއެމްއަށް ހުށަހަޅައިފައިވާ އިރު އޭގެ ތެރެއިން 8 މައްސަލައެއް ހުށަހެޅީ ހިޔާ ފްލެޓުތަކާ ގުޅިގެންނެވެ. އެއީ ޕޮއިންޓު ދިން ގޮތާ ގުޅިގެންކަމަށް އެޗްއާރުސީއެމްގެ ރިޕޯޓުގައި ވަނީ ބުނެފައެވެ.

އެޗްއާރުސީއެމްގެ ރިޕޯޓުގައި ވަނީ ނުކުޅެދުންތެރިކަން ހުންނަ ކުދިންނަށް ބޯހިޔާވަހިކަން ފޯރުކޮށް ނުދެވުމުގެ ކަންބޮޑުވުންވެސް ފާޅުކޮށްފައެވެ. އެގޮތުން ރާއްޖޭގެ އާބާދީގެ ކޮންމެ 10 މީހަކުން އެކަކީ ނުކުޅެދުންތެރިކަން ހުންނަ މީހެއް ކަމަށާއި އެމީހުންނަށް ބޯހިޔާވަހިކަން ފޯރުކޮށްދިނުމުގައި މިހާރަށްވުރެއް ބޮޑު އިސްކަމެއް ދޭންޖެހޭކަމަށް އެޗްއާރުސީއެމްއިން ވަނީ ބުނެފައެވެ.