މާފުށީ ޖަލު އާއްމު ހާލަތަށް ގެނެސްފި
ކޮވިޑް-19އާ ގުޅިގެން ކުއްލި ހާލަތަށް ގެނައި މާފުށީ ޖަލު އާއްމު ހާލަތަށް ގެނެސްފިއެވެ.
ކަރެކްޝަންސްއިން ބުނީ މާފުށި ޖަލުގައި ފެތުރެމުންދިޔަ ކޮވިޑް-19ގެ ވައިރަސް ކޮންޓްރޯލް ކުރެވި ބަލި ޖެހިފައިވާ މީހުންގެ އަދަދު ދަށްވަމުން ދާތީ، ރޭ 19:00އިން ފެށިގެން ޖަލުގެ އެލާޓް ލެވެލް ދަށްކުރެވިފައިވާ ކަމަށެވެ.
މާފުށީ ޖަލުގެ އެންމެ ފަހުގެ ތަފާސްހިސާބުތަކަށް ބަލާއިރު މިހާރު ހަރަކާތްތެރި ވޭދަނައިގެ ގޮތުގައި ތިބީ 27 ގައިދީންނެވެ. މި ގައިދީންނާ ގާތުން އެއްތާވި މީހުންގެ ގޮތުގައި 27 ގައިދީން ވަނީ އެކަހެރިކޮށްފައެވެ.
މާފުށީ ޖަލުގައި މަސައްކަތްކުރާ އޮފިސަރުންތަކަކާއި ޖަލުގައި ތިބި ގައިދީންތަކެއް ކޮވިޑަށް ފައްސިވުމާ ގުޅިގެން، ޖަލު ކުއްލި ހާލަތަށް ގެނެސްފައި ވަނީ މި މަހުގެ 14ވަނަ ދުވަހުއެވެ. މާފުށީ ޖަލުން އެންމެ ފުރަތަމަ ފައްސިވެފައި ވަނީ އަލާމާތްތައް ހުރެގެން ސުންކު ނެގި އޮފިސަރުންނާއި ގައިދީންނެވެ.
