އިންތިގެ ވައުދު: އެމްޑީޕީއަކީ އެންމެ ވަރުގަދަ ޕާޓީގެ ގޮތުގައި ބޭއްވުމަށް މަސައްކަތް ކުރާނަން
ވެރިކަން ކުރާ މައި ޕާޓީ، މޯލްޑިވިއަން ޑިމޮކްރެޓިކް ޕާޓީ(އެމްޑީޕީ)އަކީ އެންމެ ވަރުގަދަ ސިޔާސީ ޕާޓީގެ ގޮތުގައި ބޭއްވުމަށް މަސައްކަތް ކުރައްވާނެ ކަމަށް އެޕާޓީގެ ޗެއާޕާސަން ކަަމަށް ވާދަކުރައްވާ، ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ(އިންތި) ވިދާޅުވެއްޖެއެވެ.
އޭނާ މިހެން ވިދާޅުވެފައި ވަނީ "ދައުރު"އަށް ދެއްވި ބަސްދީގަތުމެއްގައެވެ. އިންތި ވަނީ އޭނާއަކީ އަބަދުވެސް ތެދުވެރި، ނަޒާހާތްތެރި މީހެއް ކަމަށާއި، މި ސިފަތަކަށް ޓަކައި އެމްޑީޕީގެ އާންމު މެމްބަރުން އޭނާއަށް ވަރަށް އިތުބާރު ކުރާކަން ޔަގީން ކުރައްވާ ކަމަށް ވިދާޅުވެފައެވެ.
އިންތި ވިދާޅުވީ އޭނާއަކީ އެމްޑީޕީއާ ވަަރަށް ގާތް މީހެއް ކަމަށެވެ. ސަބަބެއް ކަމަށް ވިދާޅުވީ، ރަސްމީކޮށް އެޕާޓީ ރަޖިސްޓްރީ ކުރުމުގެ ކުރިން ވެސް، ޕާޓީގެ ފިކުރަށް އޭނާގެ ހިތުގައި ވަރަށް ބޮޑު ލޯތްބެއް އޮތުމެވެ.
އިންތި ވިދާޅުވީ، އޭނާއަށް ޗެއާޕާސަންގެ މަގާމު ލިބިއްޖެ ނަމަ، އެމްޑީޕީ އެކަތިގަނޑަކަށް ހައްދަވާނެ ކަމަށެވެ.
"ޕާޓީއަކީ، މެމްބަރުން އަދިވެސް އިތުބާރު ކުރާ، އެމްޑީޕީއޭ ބުނީމަ، އެބޭފުޅުންގެ ވިންދާ ސީދާ އަދިވެސް ގުޅުންހުރި ޕާޓީއެއްގެ ގޮތުގައި ބޭއްވުމަށް ޓަކައި މި ލިބޭ ފުރުސަތުގައި ވޯޓަށް ހުރިހާ ބޭފުޅުން ވެސް ނުކުމެ، އަދި އެއްވެސް ޒާތެއްގެ ނުފޫޒެއްގައި ނުޖެހި ވޯޓުދޭށޭ." އޭނާ ވިދާޅުވިއެވެ.
މީގެ އިތުރުން އިންތި ވިދާޅުވީ އެމްޑީޕީގެ ދިގު ތާރީހުގައި އެ ޕާޓީއަށް ގިނަ ހިދުމަތްތަކެއް ކޮށްދެވިފައިވާނެ ކަމަށެވެ.
އަދި ނުފޫޒު ގަދަ، އެކި މަގާމުތަކުގައި ހުންނައިރު، ނާޖާއިޒް މަންފާ ނަގައި، މާލީ ތަނަވަސްކަން ހޯދުމަށް އެކި އެކި ގޮތްގޮތުން މަގުފަހިވީ ނަމަވެސް، އޭނާއަކީ އަމާނާތްތެރިކަމާއެކުގައި މަސައްކަތް ކުރަމުން އަންނަ މީހެއް ކަމަށް ވެސް ވިދާޅުވިއެވެ.
އަންނަ އޭޕްރީލްމަހުގެ 16ވަނަ ދުވަހު ބާއްވާ އެމްޑީޕީގެ ޗެއާޕާސަންގެ އިންތިޚާބުގައި އިންތިގެ އިތުރުން ވާދަ ކުރައްވަނީ އިކޮނޮމިކް މިނިސްޓަރު ފައްޔާޒު އިސްމާއީލްއެެވެ.
