ފަތުރުވެރިންތަކެއްގެ އަތުން އޮޅުވައިލައިގެން ހޯދި ފައިސާތަކެއް އަނބުރާ ރައްދު ކޮށްދީފި
ފަތުރުވެރިންތަކެއްގެ އަތުން އޮޅުވައިލައިގެން އަތުލި ފައިސާތަކެއް ފުލުހުން ހޯދައި، ވެރިފަރާތާ ހަވާލުކޮށްފިއެވެ.
ފުލުހުން ވިދާޅުވީ ފެބްރުއަރީ 6ވަނަ ދުވަހު ރާއްޖެއައި ފަތުރުވެރިންތަކެއް ސަފާރީއަކަށް ގެންގޮސްދޭނެ ކަމަށް ބުނެ އެ މީހުންގެ އަތުން ފައިސާތަކެއް އަތުލައިފައިވާކަމުގެ މައްސަލައެއް ފެބްރުއަރީ 12ވަނަ ދުވަހު އދ. ދަނގެތީ ޕޮލިސް ސްޓޭޝަނަށް ހުށަހަޅައިފައިވާ ކަމަށެވެ.
އެ މައްސަލައާ ގުޅިގެން އެ ފައިސާތައް ހޯދުމަށް ދަނގެތީ ޕޮލިސް ސްޓޭޝަނާއި ކ. ގުޅީ ޕޮލިސް ޑެސްކު ގުޅިގެން ކުރިއަށް ގެންދިޔަ އޮޕަރޭޝަނުގައި، މި މަހުގެ 19ވަނަ ދުވަހު ފައިސާތައް ހޯދައިފައިވާ ކަމަށް ފުލުހުން ވިދާޅުވިއެވެ.
ފުލުހުން ވިދާޅުވީ އެ ފައިސާތައް ހޯދައިފައި ވަނީ ފަތުރުވެރިން ސަފާރީއަކަށް ގެންގޮސްދޭނެ ކަމަށް ބުނި މީހާގެ އެކައުންޓަށް ޓްރާންސްފަރކޮށްފައި ވަނިކޮށް ކަމަށެވެ. އަދި 1050 ޔޫއެސް ޑޮލަރު ހޯދައި އޭގެ ވެރިފަރާތާ މިހާރު ހަވާލުކޮށްފައިވާ ކަމަށް ފުލުހުން ވިދާޅުވިއެވެ.
