އެމްޑީޕީގެ އާންމު މެމްބަރުންގެ ތެރެއިން ގިނަ ބަޔަކު ޕާޓީއާ ދުރަށް ޖެހޭކަން ފާހަގަ ކުރެވޭ: އިންތި
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އާންމު މެމްބަރުންގެ ތެރެއިން ގިނަ ބަޔަކު އެ ޕާޓީއާ ފެޔަށް ޖެހެމުން އަންނަކަން ފާހަގަ ކުރެވޭ ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު، އަދި އެޕާޓީގެ ޗެއާޕާސަންގެ މަގާމަށް ވާދަކުރައްވާ އިމްތިޔާޒު ފަހުމީ(އިންތި) ވިދާޅުވެއްޖެއެވެ.
ދިވެހި ޗެނަލްގައި ރޭ ވާހަކަ ދައްކަވަމުން އިންތި ވިދާޅުވީ އެމްޑީޕީން އަބަދުވެސް ނަގަހައްޓަމުން އައި އަސާސްތަކުގައި ނުހިފެހެއްޓުމުގެ ނަތީޖާއެއްގެ ގޮތުން، އެ ޕާޓީގެ އާންމު މެމްބަރުންގެ ތެރެއިން ގިނަ ބަޔަކު ޕާޓީއަށް ނުތަނަވަސްކަމުގެ ބަސްތައް ރައްދު ކުރަމުން އަންނަ ކަމަށެވެ.
"އެހެންކަމުން މި ޕާޓީގެ އަސާސްތައް، ހަމަ އެންމެ ކުރީގައި، ފެށުނު އިރުގައި، ރައްޔިތުންނަށް ހެޔޮ ގޮތްތައް ހޯދައިދިނުމުގެ، ޕާޓީ ހިންގުމުގައި ވެސް އެ ކަންކަން އަށަގެންނެވުމަށް ޓަކައި އިތުރު މަސައްކަތްތަކެއް ކުރަން ޖެހިއްޖެ ކަމަށް ގަބޫލު ކުރެވޭ." އިންތި ވިދާޅުވިއެވެ.
އިންތި ވިދާޅުވީ މިހާރު ވެރިކަމުގައި ހުންނެވީ އެމްޑީޕީގެ ކެނޑިޑޭޓެއް ނަމަވެސް، ވެރިކަން ކުރަމުންދަނީ ގުޅިފައިވާ ކޯލިޝަނަކުން ކަމަށްވާތީ، އެމްޑީޕީގެ އާންމު މެމްބަރުން އެންމެ ހިތް އެދޭ ގޮތަށް ކަންކަން ނުވާ ކަމަށެވެ.
ކޯލިޝަން ސަރުކާރެއްގެ ތެރެއިން، އެމްޑީޕީގެ މެމްބަރުން ހިތްހަމަ ނުޖެހޭ ކޮންމެ ކަމެއް ހިނގިޔަސް، އެ ކަންކަން ރައްދު ވަނީ މައި ޕާޓީ އެމްޑީޕީއަށްކަން ފާހަގަކުރައްވައި، އިންތި ވަނީ އެ ކަންކަން ގުޅިފައި ވަނީ ވެސް އެމްޑީޕީގެ އަސާސްތަކާ ކަމަށް ވިދާޅުވެފައެވެ.
އޭނާ އިތުރަށް ވިދާޅުވީ އެމްޑީޕީގެ އާންމު މެމްބަރުންގެ ހިތްހަމަ ނުޖެހުން އެންމެ ބޮޑަށް ފެނިގެން ދިޔައީ އެންމެ ފަހުން ބޭއްވި ލޯކަލް ކައުންސިލްތަކުގެ އންތިހާބުގައި ކަމަށެވެ. އެ އިންތިޚާބުގައި އެ ޕާޓީއަށް އަބަދުވެސް އާނބަސް ބުނާ މާލެ ސިޓީން، ނޫނެކޭ ބުނީ ކީއްވެގެންގެން ދެނެގަންނަން ޖެހޭ ކަމަށް ވެސް އޭނާ ވިދާޅުވިއެވެ.
މާލޭ މީހުންނަށް ހުޅުމާލެއިން ގޯތި ދިނުމަކީ ރިޔާސީ ވަޢުދެއް. މާލޭމީހުން އަތުން ވޯޓުހޯދައިގެން ވެރިކަމަށް އައިސް، ގޯތި ނުދީ މަކަރާހީލަތުން ވޯޓުހޯދުމުން މާލޭމީހުން ނޫނެކޭ ބުނީ.