ރާއީ ވިދާޅުވަނީ ފައްޔާޒު މާ "ހިންގާލާނެ"ކަމަށް
މޯލްޑިވިއަން ޑިމޮކްރެޓިކް ޕާޓީ(އެމްޑީޕީ)ގެ ޗެއާޕާސަންގެ މަގާމަށް، އިކޮނޮމިކް މިނިސްޓަރު ފައްޔާޒު އިސްމާއީލް ހޮވިވަޑައިގެންފި ނަމަ، "ހިންގާލާނެ"ކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެއެވެ.
ވަރަށް ވާދަވެރި ކެމްޕެއިނެއް ކުރަމުން އަންނަ އެމްޑީޕީގެ ޗެއާޕާސަންގެ އިންތިހާބު ބޭއްވުމަށް ހަމަޖެހިފައި ވަނީ އަންނަ އޭޕްރީލްމަހުގެ 16ވަނަ ދުވަހުއެވެ.
މި އިންތިހާބުގައި ފައްޔާޒުގެ އިތުރުން ވާދަ ކުރައްވަނީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ(އިންތި)އެވެ.
ފައްޔާޒަށް ތާއީދު ކުރައްވާކަން ހާމަކުރައްވައި މެމްބަރު ރާއީ މިއަދު ވިދާޅުވީ "އެޖެންޑާ19"ގެ މުހިންމު ކަންކަން ސަރުކާރުގެ ތެރެއިން ފުރިހަމަވެގެން ދިޔުމުގެ ވަރަށް ބޮޑު ދައުރެއް، މިނިސްޓަރު ފައްޔާޒު އަދާ ކުރެއްވި ކަމަށް އޭނާއަށް ގަބޫލު ކުރެއްވޭ ކަމަށެވެ.
އަދި ފައްޔާޒަށް އިންތިހާބު ކާމިޔާބު ކުރެވިއްޖެ ނަމަ، ސަރުކާރު ތެރެއިން، މާ"ހިންގާލާނެ" ކަމަށް ވެސް ވިދާޅުވިއެވެ.
މީގެ އިތުރުން، އިއްޔެ ކުރެއްވި ޓްވީޓެއްގައި ވެސް ރާއީ ވަނީ ފައްޔާޒަށް ތާއީދު ކުރައްވަން ނިންމެވި ސަބަބު ވެސް ހާމަކުރައްވައިފައެވެ.
އެގޮތުން އޭނާ ވިދާޅުވީ ދުނިޔެއަށް ކުރިމަތިވި ކޮވިޑްގެ ޢާލަމީ ވަބާގައި، ރާއްޖެއަށް ދިމާވި ގިނަގުނަ ގޮންޖެހުންތަކާ އިކޮނޮމިކް މިނިސްޓަރުގެ ހައިސިއްޔަތުން ހިތްވަރާ އެކު ކުރިމަތިލައްވައި، ފައްޔާޒު ނަތީޖާ ނެރުއްވައިފައިވާ ކަމަށެވެ.
Ads by STO
