މަސް ގަންނަ އަގު ކިލޯއަކުން ރުފިޔާއެއް ބޮޑުކޮށްފި
މިފްކޯއިން މަސް ގަންނަ އަގު މިއަދުން ފެށިގެން ކިލޯއެއް 17 ރުފިޔާއަށް ބޮޑުކޮށްފިއެވެ.
ސަރުކާރުގެ މަސް ކުންފުނީގެ މައި ކުންފުނި އަދި އެސްޓީއޯގެ މެނޭޖިން ޑިރެކްޓަރު ހުސެއިން އަމްރު ކުރެއްވި ޓުވީޓެއްގައި ވިދާޅުވީ މަސްވެރިން އަތުން މިފްކޯއަށް މަސް ގަންނަ އަގު 17 ރުފިޔާއަށް މިއަދުން ފެށިގެން ބޮޑުކޮށްފައިވާ ކަމަށެވެ.
އަމްރު ވިދާޅުވީ މިފްކޯގެ ހިންގުން ހަރުދަނާ ކުރެވި ޚަރަދުތައް ވެސް ވަނީ ކުޑަކުރެވިފައި ކަމަށާއި ބޭރުގެ މާކެޓްތައް ހޯދި ދަޅުމަސް ބޭރުކުރެވޭ އަދަދު ވެސް އިތުރުކުރެވިފައިވާ ކަމަށެވެ.
މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ ވިދާޅުވީ މިއަދުން ފެށިގެން މަސްވެރިންގެ އަތުން މަސްގަންނާނީ މިހާރު ގަންނަ އަގަށް ވުރެ ބޮޑު އަގެއް ކަމަށާއި އެހެން ކަމުން، މަސްދަޅުގެ އަގު ބޮޑުވާނެ ކަމަށެވެ.
ފައުޒީ ވިދާޅުވީ 1.5 ކިލޯއިން މަތީގެ ކަނޑުމަހާއި ކަންނެލި މިހާރު ގަންނަނީ 17 ރުފިޔާއަށް ކަމަށާއި ކުރިން ގަންނަމުން އައީ 16 ރުފިޔާއަށް ކަމަށެވެ. އަދި އައިސް އެޅި، އައިސް ނާޅާ މަސް ގަންނަމުން އައީ 14 ރުފިޔާއަށް ކަމަށާއި މީގެ އަގު 15އަށް ބޮޑުކޮށްފައިވާ ކަމަށް ފައުޒީ ވިދާޅުވިއެވެ.
ފައުޒީ ވިދާޅުވީ، މަސްދަޅުގެ އައު އަގުތަކުގެ ތަފްސީލު މިފްކޯގެ ސޭލްސް ޓީމުން ވަރަށް އަވަހަށް އާންމު ކުރާނެ ކަމަށެވެ.
Ads by STO
