ވަގު ސްލިޕް ފޮނުވައިގެން ލައްކައަކަށް ވުރެ ގިނަ ރުފިޔާގެ މުދާ ނެގި މީހަކު ހައްޔަރުކޮށްފި
ހުޅުމާލޭގެ ފިހާރައަކުން ފޭކް ސްލިޕް ފޮނުވައިގެން އެކި ދުވަސްމަތީން އެއްލައްކައަށް ވުރެ ގިނަ ރުފިޔާގެ މުދާ ނެގި މީހަކު ހައްޔަރު ކޮށްފިއެވެ.
އިއްޔެގެ ވަގުތެއްގައި ފުލުހުން ހިންގި އެ އޮޕަރޭޝަންގައި ކޯޓު އަމުރެއްގެ ދަށުން ހައްޔަރުކޮށްފައި ވަނީ އުމުރުން 25 އަހަރުގެ ދިވެހި ފިރިހެނެކެވެ.
މިކަމާ ގުޅޭ ގޮތުން ފުލުހުން ވިދާޅުވީ، އެމީހާ ހައްޔަރުކޮށްފައި ވަނީ ހުޅުމާލޭ ފިހާރައަކުން ޖަނަވަރީ މަހުގެ އެކި ދުވަސްމަތިން ސައްހަ ނޫން ސްލިޕް ފޮނުވައިގެން މަކަރާއި ހީލަތުން އެއްލައްކަ އަށްވުރެން ގިނަ ރުފިޔާގެ މުދާ ނަގައިފައިވާ ކަމަށް ހުށަހެޅިފައިވާ މައްސަލައާ ގުޅިގެން ފުލުހުން ހިންގި އޮޕަރޭޝަނެއްގައި ކަމަށެވެ.
ސައްހަ ނޫން ސްލިޕް ފޮނުވައިގެން އެ ޒުވާނާ ހުޅުމާލޭގެ އެ ފިހާރައިން ނެގި ތަކެތީގެ ތެރެއިން އަށްޑިހަ ހާހަށް ވުރެ ގިނަ ރުފިޔާގެ ތަކެތި ހޯދައި ފުލުހުންގެ ބެލުމުގެ ދަށަށް ގެނެސްފައިވާ ކަމަށް ވެސް ފުލުހުން ވިދާޅުވިއެވެ.
އެ މީހާގެ ބަންދަށް 15 ދުވަސް ޖަހައިފައިވާ އިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
Ads by STO
