ފުލުހަކަށް ބިރު ދައްކައިގެން ފައިސާ ފޭރުނު މައްސަލައެއްގައި ބަޔަކު ޖަލަށްލައިފި
ފުލުހަކަށް ވަޅިއަކުން ބިރު ދައްކައިގެން ގަދަކަމުން ގެސްޓްހައުސަކަށް ގެންގޮސް، އޭނާގެ ބޭންކް އެކައުންޓުގައި ހުރި ފައިސާ ފޭރުނު މައްސަލައިގައި ދައުވާ އުފުލުނު ތިން މީހަކު، އެ ދައުވާއަށް އިއުތިރާފުވުމުން އެމީހުން ޖަލަށްލާން ކްރިމިނަލް ކޯޓުން އިއްޔެ ހުކުމް ކޮށްފިއެވެ.
އެނގިފައިވާ ގޮތުގައި އެ ފުލުސް މީހާއަށް މާލޭގައި ވަޅިއަކުން ބިރު ދައްކައިގެން، ގެސްޓްހައުސްއަކަށް ގެންގޮސް އޭނާގެ ބޭންކް އެކައުންޓުން ގާތްގަނޑަކަށް 8000 ރުފިޔާ ފޭރިގެންފައި ވަނީ މިދިޔަ އަހަރުގެ ޑިސެމްބަރު މަހުގެ 4ވަނަ ދުވަހުގައެވެ.
މި މައްސަލައިގައި ދައުލަތުން ދައުވާ ކޮށްފައިވަނީ ގ. ޑޮލްފިންހައުސް އުތުރުބުރި ހުސެއިން ޖާވިދުއާއި، ގ. ބްލޫރިވާ އާދަމް ރަޝީދުގެ އިތުރުން ށ. ކޮމަންޑޫ މަގުމަތީގޭ މަރިޔަމް މާއިންގެ މައްޗަށެވެ.
ހާދިސާ ހިނގި ގޮތް ކިޔައިދެއްވަމުން ފުލުސް މީހާ ދެއްވި ބަޔާނުގައި ވިދާޅުވެފައި ވަނީ އޭނާގެ "ރަހުމަތްތެރި" އަންހެނެއް ކަމަށްވާ މާއިންއަށް ގުޅައި އެރޭ އޭނާ ހުރި ގޯޅިއަކަށް ގޮސް ބައްދަލު ކުރި ކަމަށެވެ. އަދި އެ ފުލުސް މީހާ އަންހެން މީހާއާ އެކު އެ އަންހެން މީހާގެ ގެއަށް ދާން ހިނގައިގަތް ތަނާ އެ ގޯޅިގަނޑުގެ ތެރޭގައި ތިބި ދެ މީހަކު އޭނާ ކައިރިއަށް އައިސް ދިގުމިނުގައި ގާތްގަނޑަކަށް އަށް އިންޗި ހުރި ވަޅިއެއް ބަނޑުގައި ޖައްސައި ގެސްޓްހައުސްއެއްގެ ކޮޓަރިއަކަށް ގެންދިޔަ ކަމަށް ވެސް ވިދާޅުވެފައިވެއެވެ. ފުލުސް މީހާގެ ގައިގައި ވަޅި ޖެއްސީ އާދަމް ރަޝީދު ކަމަށާއި ނުގޮސްފި ނަމަ ހަމަލާ ދޭނެ ކަމުގެ އިންޒާރު ހުސެއިން ޖާވިދު ދިން ކަމަށް ވެސް ވިދާޅުވިއެވެ.
ފުލުސް މީހާ އިތުރަށް ވިދާޅުވީ، އޭނާ ކޮޓަރިއަށް ވެއްދުމަށް ފަހު ޖާވިދު އޭނާގެ މޫނުމަތީގައި ގޮށްމުއްކަވައިފައި ފަސް ފަހަރު ޖަހައި، އޭނާގެ އެކައުންޓުގައި ހުރި ހުރިހާ ފައިސާއެއް އޭނާގެ އެކައުންޓަށް ޓްރާންސްފާ ކުރަން އެންގި ކަމަށެވެ. އަދި އެގޮތަށް އަމަލުނުކޮށްފި ނަމަ ވަޅިން ހަމަލާ ދޭނެކަމުގެ އިންޒާރު ވެސް ދިން ކަމަށް ވިދާޅުވިއެވެ. އާދަމް ރަޝީދު ހުރީ އޭނާގެ ބަނޑުގައި ވަޅި ޖައްސައިގެން ކަމަށާއި، އެކަމުގައި އޮތް އެންމެ ރަނގަޅު ގޮތަކީ ފައިސާ ދިނުން ކަމަށް މާއިން ވެސް ބުނެފައިވާ ކަމަށް ފުލުސް މީހާ ބަޔާނުގައި ވިދާޅުވެފައިވެއެވެ.
މީގެ އިތުރުން އެމީހުން ވަނީ، އެމީހުންނަށް މަސްތުވާތަކެތި ފޯރުކޮށްދޭނެ ކަމަށާއި މަގުމަތިން އެމީހުން ދިޔަޔަސް ނުހުއްޓުވާނެ ކަމަށް ފުލުސް މީހާ ލައްވައި ގަދަކަމުން ބުނުވާ، އެމަންޒަރު ވީޑިއޯ ވެސް ކޮށްފައެވެ.
އެމީހުންގެ އަތްދަށުން އެ ފުލުސް މީހާ ދޫކޮށްލައިފައި ވަނީ، ފުލުސް މީހާގެ ކަރަންޓް އެކައުންޓުގައި ހުރި 3655 ރުފިޔާއާއި ސޭވިންގްސް އެކައުންޓުގައި ހުރި 4800 ރުފިޔާ އެމީހުންނަށް ދިނުމުންނެވެ.
މި މައްސަލައިގައި ދައުވާ ލިބޭ ތިން މީހުން ވެސް ކުށަށް އިއުތިރާފުވެފައިވާތީ ގާޒީ ދީބާނާޒު ފަހުމީ ވަނީ އެންމެންނަށް އިއުތިރާފުވުމުން ލިބޭ ލުޔާއެކު އަދަބު ކަނޑައަޅައި އެ އެންމެން ވެސް ޖަލަށްލާން ހުކުމްކޮށްފައެވެ.
މަރިޔަމް މާއިންއަށް ކުރި ދައުވާތަކާއި ދިން އަަދަބުތައް:
- ހުއްދަ ނޫން ގޮތުގައި މީހުން ހިފެހެއްޓުމުގައި ބައިވެރިވުން: 27 ދުވަހަށް ޖަލަށް
- ފޭރުމުގައި ބައިވެރިވުން: ހަތް މަހާއި ހަ ދުވަހަށް ޖަލަށް (ޖަލުގައި ހޭދަ ކުރި މުއްދަތު އުނިކުރުމުން ތަންފީޒު ކުރަން ޖެހެނީ ހަތަރު މަހާއި ހަތަރު ދުވަސް)
އާދަމް ރަޝީދަށް ކުރި ދައުވާތަކާއި ދިން އަަދަބުތައް:
- ބިރު ދެއްކުން: ހަ މަސް ދުވަހަށް ޖަލަށް (ޖަލުގައި ހޭދަ ކުރި މުއްދަތު އުނިކުރުމުން ތަންފީޒު ކުރަން ޖެހެނީ ދެ މަހާއި 28 ދުވަސް)
- ހުއްދަ ނޫން ގޮތުގައި މީހުން ހިފެހެއްޓުން: އެއް މަހާއި 24 ދުވަހަށް ޖަލަށް
- ފޭރުމުގައި ބައިވެރިވުން: ހަތް މަހާއި ހަ ދުވަހަށް ޖަލަށް (ޖަލުގައި ހޭދަ ކުރި މުއްދަތު އުނިކުރުމުން ތަންފީޒު ކުރަން ޖެހެނީ ހަތަރު މަހާއި ހަތަރު ދުވަސް)
ހުސެއިން ޖާވިދަށް ކުރި ދައުވާތަކާއި ދިން އަަދަބުތައް:
- ފޭރުން: ހަތް މަހާއި ހަ ދުވަހަށް ޖަލަށް
- ހުއްދަ ނޫން ގޮތުގައި މީހުން ހިފެހެއްޓުން: އެއް މަހާއި 24 ދުވަހަށް ޖަލަށް
- ބިރު ދެއްކުން: ހަ މަސް ދުވަހަށް ޖަލަށް (ޖަލުގައި ހޭދަ ކުރި މުއްދަތު އުނިކުރުމުން ތަންފީޒު ކުރަން ޖެހެނީ ދެ މަހާއި 28 ދުވަސް)
މި ތިން މީހުން ފުލުސް މީހާގެ އަތުން ފޭރުނު ފައިސާ އެ މީހުން އަތުން ވަނީ ފެނިފައެވެ. އަދި އެ ފައިސާ ވަނީ ފުލުސް މީހާއާ ހަވާލުކޮށްފައެވެ.
