ތިލަދުންމަތީ މީހުންނަށް އިންތިގެ ގޮތް އެނގޭ: ހަސަން ލަތީފު
ތިލަދުންމަތީގެ ރަށްތަކުގައި ދިރިއުޅޭ އެމްޑީޕީގެ މެމްބަރުންގެ ތާއީދު އެ ޕާޓީގެ ޗެއާޕާސަންގެ މަގާމަށް ވާދަކުރައްވާ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ(އިންތި)އަށް އެބައޮތް ކަަމަށާއި، އިންތިގެ ގޮތް އެނގޭ ކަމަށް އެމީހުން ބުނާ ކަމަށް އެމްޑީޕީގެ ކުރީގެ ޗެއާޕާސަން ހަސަން ލަތީފު ވިދާޅުވެއްޖެއެވެ.
ހަސަން ލަތީފު ގެންދަވަނީ އިންތިއާ އެކު ކެމްޕެއިން ދަތުރުތަކުގައި ބައިވެރިވެވަޑައިގަންނަވަމުންނެެވެ.
އިންތި ކެމްޕެއިނުގައި އުޅުއްވާ މަންޒަރު ވީޑިއޯއެއް ހިއްސާ ކުރައްވައި، ހަސަން ލަތީފު ވިދާޅުވީ ތިލަދުންމަތީގެ ރައްޔިތުންނަށް ވެދާނެ ގޮތް އަންދާޒާ ކުރެވޭ ކަމަށާއި، ތިލަދުންމައްޗަށް ކުރި ދަތުރުން އެނގިގެން ދިޔައީ އެމްޑީޕީގެ ރައީސް މުހައްމަދު ނަޝީދާއި އިންތިއަށް އޮތް ލޯތްބާއި އިތުބާރު ކަމަށެވެ.
ހަސަން ލަތީފު ހިއްސާ ކުރެއްވި ވީޑިއޯގައި، އެމްޑީޕީގެ މެމްބަރަކު އިންތި އަރިހުގައި "އަބަދުވެސް އެހީ ވާނެ" ކަަމަށް ބުނެއެވެ.
އަންނަ މެއިމަހުގެ 14 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޗެެއާޕާސަންގެ އިންތިހާބުގައި އިންތިއާ ވާދަ ކުރައްވަނީ އިކޮނޮމިކް މިނިސްޓަރު ފައްޔާޒު އިސްމާއީލެވެ.
