ކަސްރަތު ކުރަން ވަގުތު ނުވާނަމަ، ބަރުދަން ލުއިކުރާނީ ކިހިނެއް؟
ކަސްރަތު ކުރުމަކީ ދުޅަހެޔޮ ސިއްހަތެއްގައި ހުރުމަށް ޓަކައި ކޮންމެހެން ވެސް ބޭނުންތެރި ކަމެކެވެ. ހަށިގަނޑުގެ ބަރުދަން ލުއިކޮށް، އެއްވަރެއްގައި ހިފެހެއްޓުމަށް ޓަކައި ވެސް ކަސްރަތު މުހިންމެވެ.
އެހެން ނަމަވެސް، ކަސްރަތުކޮށްގެން ބަރުދަން ލުއިކުރުމަކީ، ގިނަ ފަހަރު އެތައް ދުވަހެއްގެ މަަސައްކަތުން ނޫނީ ހާސިލު ނުވެވޭ ކަމަކަށް ވަނީ ވެފައެވެ.
މި ލިޔުމުގައި މިބަލައިލަނީ ބުރަ ބޮޑު ކަސްރަތުތަކަށް ބަރޯސާ ނުވެ، ބަރުދަން ލުއި ކުރެވިދާނެ ބައެއް ގޮތްތަކަށެވެ.
ކަޅު ކޮފީ، އެކަމަކު ހަކުރު ނުލައި:
ހަކުރު ނާޅައި ދުވާލަކު ކަޅު ކޮފީ ތައްޓެއް ބުއިމަކީ ބަރުދަން ލުއި ކުރުމަށް އެހީއަކަށް ވަނީ އޭގައި ކެލެރީސް ހިމެނޭ މިންވަރު މަދުވުމުންނެވެ. ކަޅުކޮފީގެ 60 އިންސައްތަ ކެލެރީއަކީ އެއަށް އަޅާ ހަކުރެވެ. އެހެންކަމުން، ކޮފީއަށް ހަކުރު ނާޅާ ނަމަ، ހަށިގަނޑުގައި ހަކުރު ހުންނަ މިންވަރު އިތުރު ވެގެން ދިޔުމުން ވެސް ސަލާމަތް ވެވިދާނެއެވެ.
ގިނައިން ފެން ބުއިން:
ހަށިގަނޑަށް ބޭނުންވާ މިންވަރަށް ކޮންމެ ދުވަހަކު ވެސް ފެން ބުއިމަކީ ވަރަށް މުހިންމު ކަަމެކެވެ. ކެއުމުގެ ކުރިން ފެން ބުއިމަކީ ގިނައިން ކާހިތްވުމުން ދުރުކޮށްދޭ ކަމެކެވެ. ދިރާސާތަކަށް ބަލާއިރު، ދުވާލަކު 1 ނޫނީ 2 ލީޓަރު ފެން ބުއިމަކީ ބަރުދަން ލުއި ކުރުމަށް އެހީއެކެވެ.
ޖަންކް ފުޑްގެ ބަދަލުގައި މޭވާ ފަދަ ތަކެތި ކެއުން:
ކެއުމުގެ ވަގުތުތަކުގެ އިތުރުން، އެހެން ގަޑިތަކުގައި ބަނޑުހައިވުމުން، އަހަރުމެންގެ ތެރެއިން ގިނަ މީހުންނަށް ކެެވެނީ ސިއްހީ ގޮތުން ފައިދާއެއް ނުކުރާ ކެއުންތަކެވެ. ޕިއްޒާއެއް ނޫނީ ސަބްމެރިންއެއް ކަހަލަ އެއްޗެކެވެ. މިފަދަ ކެއުންތަކުގެ ބަދަލުގައި، މީރު މޭވާއެއް ކަހަލަ އެއްޗެއް ކެވިދާނެއެވެ. "ކްރޭވިންސް" އަންނަ ކޮންމެ ފަހަރަކު ކެލެރީ ގިނަ ކެއުންތައް ކެއުން ހުއްޓައިލާށެވެ.
ކަސްރަތު ނުކޮށް ބަރުދަން ލުއި ކުރުމަކީ ކުރެވިދާނެ ކަމެއް ކަމުގައިވިޔަސް، ކަސްރަތު ކުރުމަކީ ވަރަށް މުހިންމު ކަމެއްކަން ދަންނަން ވާނެއެވެ. ކޮންމެ ދުވަހަކު ވެސް ހަރަކާތްތެރިވެ އުޅުމަކީ ދުޅަހެޔޮ ސިއްހަތެއްގައި ހުރުމަށް، ކޮންމެހެން ވެސް މުހިންމު ކަމެކެވެ.
