އަހަރުތަކަކަށް ފަހު މެޑަމް ފާތުން ސަޕޯޓަރުންނާ އެކު
ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ވެރިކަން ބަދަލުވުމަށް ފަހު އަދި އެތައް އަހަރެއް ވަންދެން އާންމުންނަށް ނުފެނި ހުރުމަށް ފަހު، އެމަނިކުފާނުގެ އަނބިކަނބަލުން އަދި ކުރީގެ ފަސްޓް ލޭޑީ ފާތިމަތު އިބްރާހިމް ރޭ އިދިކޮޅު ސަޕޯޓަރުންނާ އެކީ ފެނިލައްވައިފިއެވެ.
އެގޮތުން މެޑަމް ފާތުން ވަނީ ރޭ ހުޅުމާލޭގައި އިދިކޮޅު ކޯލިޝަންގެ ސަޕޯޓަރުން އިންތިޒާމު ކޮށްގެން ބޭއްވި ހަފްލާއެއްގައި ބައިވެރިވެވަޑައިގެންފައެވެ.
މިއީ މީޑިއާތަކަށް ދައުވަތު ދީގެން ބާއްވަފައިވާ ހަރަކާތަކަށް ނުވާތީ، ހަފްލާއާ ގުޅޭ އިތުރު ތަފްސީލެއް ލިބިފައެއް ނުވެއެވެ.
ރައީސް ޔާމީންގެ ވެރިކަމުގައި މެޑަމް ފާތުން ވަނީ ސިޔާސީ ގިނަ ހަރަކާތްތަކެއްގައި ބައިވެރިވެވަޑައިގެން، އެމަނިކުފާނަށް ސަޕޯޓު ހޯދައިދެއްވުމުގައި ވެސް ބުރަ މަސައްކަތްތަކެއް މީގެ ކުރިން ކުރައްވައިފައެވެ.
އެގޮތުން ސިޔާސީ ކަންތައްތަކުގައި އަމަލީ ގޮތުން ބައިވެރިވެވަޑައިގެން، ބައެއް ރަށްރަށަށް ވެސް ދަތުރު ކުރައްވައި، އެކި ކަހަލަ ރެލީތަކުގައި ވެސް ބައިވެރިވެވަޑައިގެންނެވިއެވެ. މެޑަމް ފާތުން ފާހަގަ ކުރެއްވެނީ ވަރަށް ހަރަކާތްތެރި އަދި އިޖުތިމާއީ ޚިދުމަތްތެރި ބޭކަނބަލެއްގެ ގޮތުގައެވެ.
