އަރުޝަދު ދޫކޮށްލަން ނިންމި ފުލުހުންގެ މައްސަލަ އެންއައިސީއަށް
ޑްރަގް ވިޔަފާރީގެ ބޮޑެއްކަމަށް ބުނާ ގދ.ހޯނޑެއްދޫ/އަލޯރާ, އަރުޝަދު ޚާލިދު ހައްޔަރުކޮށް, ބަންދުގައި ބަހައްޓައިގެން ކޯޓަށް ހާޒިރުކުރަން އަމުުރުކޮށްފައިވަނިކޮށް, އޭނާ ބަންދު ދޫކޮށްލުމަށް ނިންމި ފުލުސް އޮފިސަރުންގެ މައްސަލަ ބެލުމަށް ނޭޝަނަލް އިންޓެގްރިޓީ ކޮމިޝަން (އެންއައިސީ) އާއި ޕޮލިސް ބޯޑަށް ހުށަހަޅައިފިއެވެ.
އަރުޝަދު ހައްޔަރުކޮށް، ބަންދުގައި ބަހައްޓައިގެން ކޯޓަށް ހާޒިރުކުރުމަށް ހައިކޯޓުން ފުލުހުންނަށް އަމުރުކޮށްފައިވަނިކޮށް، މި މަހުގެ 12 ވަނަ ދުވަހުގެ 19:45 އަށް އަރުޝަދު އެ ކޯޓަށް ހާޒިރުކޮށްފައިވަނީ ހައްޔަރުން ދޫކޮށްލައި، އެކަމާ ގުޅޭ ލިޔުމެއް އޭނާއަށް ރައްދުކުރުމަށްފަހުގައެވެ.
ޕްރޮސެކިއުޓާ ޖެނެރަލްގެ އޮފީހުން މިއަދު ބުނީ އެ ކަމުގައި ފުލުހުން ޢަމަލުކޮށްފައިވާ ގޮތް ހައިކޯޓުގެ އަމުރާ ޚިލާފު ކަމަށެވެ.
ޕީޖީ އޮފީހުން ބުނީ ހައްޔަރުކުރުމަށް ހައިކޯޓުން އަމުރު ނެރުމާއެކު، އެ ކަމުގައި ޢަމަލުކުރަންވީ ގޮތުގެ އިރުޝާދު އެ އޮފީހުން ފުލުހުނަށް ދެމުން ގެންދިޔަ ކަމަށެވެ. އަދި އަރުޝަދު ފުލުހުންގެ ބެލުމުގެ ދަށަށް ގެންދިއުމަށްފަހު، އޭނާ ބަންދުން ދޫކޮށްލުމަށް އެއްވެސް އިރުޝާދެއް ދީފައި ނުވާނެ ކަމަށާއި, އޭނާ ބަންދުން ދޫކޮށްލުމާގުޅޭ ގޮތުން ފުލުހުން އެ އޮފީހުގެ ލަފަޔަކަށް އެދިފައިނުވާކަމަށް ވެސް ޕީޖީ އޮފީހުން ބުންޏެވެ. އަދި މިކަން ހިނގާފައިވަނީ މައްސަލަ ތަޙުޤީޤުކުރާ ފަރާތާއި، ތަޙުޤީޤުކުރި ޑިޕާޓްމަންޓަށް އެނގުމެއްނެތި ކަމަށް މަޢުލޫމާތު ލިބިފައިވާކަމަށް ވެސް ޕީޖީ އޮފީހުން ބުންޏެވެ.
''އެހެންކަމުން، ދިވެހިރާއްޖޭގެ ހައިކޯޓުގެ އަމުރާ ޚިލާފަށް އަރުޝަދު ޚާލިދު ހައްޔަރުން ދޫކުރުމަށް ނިންމި، އަދި ހައްޔަރުން ދޫކޮށްލި ލިޔުން ތައްޔާރުކުރި ފުލުސް އޮފިސަރުންގެ މައްސަލަ ބެލުމަށް ނޭޝަނަލް އިންޓެގްރިޓީ ކޮމިޝަނަށް މި އޮފީހުން ވާނީ އަންގާފައެވެ. އަދި މިކަން ޕޮލިސް ބޯޑުގެ ސަމާލުކަމަށްވެސް ވާނީ ގެނެސްފައެވެ.'' ޕީޖީ އޮފީހުން ބުންޏެވެ.
https://twitter.com/DhenOnline/status/1580297533305520128?t=b8mQyvpaT7E34uu6-sx_sw&s=19
މި މައްސަލައިގައި ދިވެހި ފުލުހުންގެ ޚިދުމަތުގެ މުވައްޒަފުންތަކެއް ގޯސްތަކެއް ހަދާފައިވީ ނަމަވެސް، މި މައްސަލަ ސުޕްރީމް ކޯޓުގައި އިސްތިއުނާފުކުރާނެކަމަށް ވެސް ޕީޖީ އޮފީހުން ވަނީ ބުނެފައެވެ.
