ސިނަމާލެ ބްރިޖް ހެދި އިރު ކަނޑަށް ވެއްޓިފައިވާ އޮތް ހޮޅިއަކުން އަދި ވެސް ފަރަށް ގެއްލުން
މާލެއާއި ހުޅުލެ ގުޅުވާލާ، ސިނަމާލެ ބްރިޖްގެ މަސައްކަތްކުރިއިރު، އެ ސަރަހައްދުގެ ކަނޑަށް ވެއްޓިފައިވާ އޮތް ހޮޅިއަކުން ފަރަށް ގެއްލުން ލިބޭ މައްސަލަައެއް ފެންމަތިވެއްޖެއެވެ.
އެތަނުގެ ވީޑިއޯއަކާ އެކު ކަންބޮޑުވުން ފާޅުކުރި މީހަކު ޓްވިޓަރގައި ބުނީ، އެއީ ސިނަމާލެ ބްރިޖް ހެދިއިރު ކަނޑަށް ވައްޓާލި ދަނގަނޑެއް ކަމަށާއި، މިހާރު އެ އޮތީ، ލޮނު ޒިޔާރަތްކޮޅުގައި ރާޅާ އަޅާ ސަރަހައްދުގައި ކަމަށެވެ.
އެ ސަަރަހައްދަށް ރާޅާ އަޅާ މިމީހާ ބުނެފައިވަނީ، އެ ހޮޅީގެ ސަބަބުން އެ ސަރަހައްދުގެ ފަރަށް ގެއްލުން ލިބެމުންދާ ކަމަށެވެ. އަދި ދިޔަ ބޮޑުވެ، ރާޅު ނަގައި ކޮންމެ ފަހަރަކު މި ހޮޅި ފަރުގައި ޖެހޭ ކަމަށް ބުނެފައިވެއެވެ. އެ މީހާގެ މައިގަނޑު ކަންބޮޑުވުމަކީ، މި ދުވަސްވަރު ނޭޝަނަލް ޖޫނިއާ ޗެމްޕިއަންޝިޕަށް ޓްރެއިންވުމުގެ ގޮތުން އެ ސަރަހައްދުގައި ހަގު ސާފަރުން ޓްރެއިނިންތައް ހަދަމުންދާތީއެވެ. އަދި ހޮޅީގެ ސަބަބުން އަނިޔާއެއް ލިބިދާނެތީ ހޮޅި ނަގައިދިނުމަށްވަނީ އެދިފައެވެ.
ސިނަމާލެ ބްރިޖްގެ މަސައްކަތް ކޮށްފައިވަނީ ޗައިނާގެ ސީސީސީސީ ކުންފުނިންނެވެ. ބްރިޖްގެ މަސައްކަތް ކުރިއިރު، އެ ސަރަހައްދުގެ ކަނޑަށް ގިނަ އަދަދެއްގެ ދަގަނޑު ހޮޅިތަކާއި ކުނި އަޅާފައި ހުރުމުން އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން ހައުސިންގް މިނިސްޓްރީ ވަނީ ޖޫރިމަނާކޮށްފައެވެ. 892،500ރ. އިން މިނިސްޓްރީ ޖޫރިމަނާކުރީ 2019 ގެ ޖުލައި މަހުގެ ތެރޭގައެވެ. އެއީ ބްރިޖް ހެދީ ހައުސިންގް މިނިސްޓްރީގެ ބެލުމުގެ ދަށުން ކަމަށްވާތީއެވެ.
އެފްކޮންސް އިން ހަދަމުންދާ ވިލިމާލޭގެ މަސައްކަތަށް ބޭނުންކުރާ ޕްލެޓްފޯމެއް ވިލިމާލެ ފަރަށް އަރައިގެން ވެސް ދާދިފަހުން ވަރަށް ބޮޑަށް ގެއްލުންވެފައެވެ. މިހާތަނަށް މިކަމާ ގުޅިގެން އެއްވެސް ފަރާތެއް ޖޫރިމަނާކޮށްފައެއް ނުވެއެވެ.
Ads by STO
