އައްނަބީލާ ޙަބީބާ ޙުސައިން ޙަބީބު އަވަހާރަވެއްޖެ
ދިވެހި އަދަބިއްޔާތާއި ތާރީޚަށް ގިނަގުނަ ޚިދުމަތްތަކެއް ކުރައްވާފައިވާ ނިޝާން ދިޔަމިގިލީ ޝަރަފުގެ ޢިއްޒަތުގެ ވެރިޔާ އައްނަބީލާ ޙަބީބާ ޙުސައިން ޙަބީބު އަވަހާރަވެއްޖެއެވެ.
މަޢުލޫމާތު ލިބިފައިވާ ގޮތުގައި ޙަބީބާ އަވަހާރަވީ އޭޑީކޭ ހޮސްޕިޓަލުގައި ފަރުވާދެމުންދާތާ ދުވަސްތަކެއްވީ ފަހުން މިއަދުގެ ވަގުތެއްގައެވެ. އަވަހާރަވިއިރު ޢުމުރުފުޅަކީ 92 އަހަރެވެ.
ޙަބީބާ ކިޔަވާ ވިދާޅުވީ ހައިދަރުއާބާދުންނާއި ސްރީލަންކާއިންނެވެ. ހައިދަރުއާބާދުން އުރުދޫ މީޑިއަމުން މެޓްރިކިއުލޭޝަން ހެއްދެވިއިރު, އިނގިރޭސިމީޑިއަމަށް ކިޔަވައި ވިދާޅުވީ ލަންކާއިންނެވެ.
މީގެ އިތުރުން އެކަމަނާ ވަނީ އިންޑިޔާނާ ޔުނިވަރސިޓީ އެމެރިކާއިން ފޯކްލޯރގެ ކޮރަސްޕޮންޑެންސް ކޯހެއް ވެސް ފުރިހަމަކުރައްވާފައެވެ.
ޙަބީބާ ދިވެހި ތާރީޚުގެ ތެރެއަށް ވެދެވަޑައިގެންނެވީ 1955 ވަނަ އަހަރުން ފެށިގެން އައި އަހަރުތަކުގައި މަޖީދިއްޔާ ސްކޫލާއި އަމީނިއްޔާ ސްކޫލްގެ މުދައްރިސާއެއްގެ ވަޒީފާގައި ހުންނެވި ދުވަސްވަރުގައެވެ.
ޢުމުރުފުޅުގެ އެންމެ ފަހު އެންމެ ފަހު ދުވަސްވަރާ ހަމައަށް ވެސް
ލިޔުންތެރިކަމުގެ މަސައްކަތް ކުރިއަށް ގެންދެވިއެވެ.
ފުރަތަމަ ލިޔުއްވީ 1954 ވަނަ އަހަރު ނުކުތް ''މުންނާރު'' ނޫހަށެވެ. އޭގެފަހުން 1958 ވަނަ އަހަރު ''ވިޔަފާރި މިއަދު'' ގެ ސޮފުހާތަކުން ޙަބީބާގެ ލިޔުންތައް ފެނިގެންދިޔައެވެ.
މީގެ އިތުރުން އެ ދުވަސްވަރު ނުކުތް ވަރަށް ގިނަ ނޫސް މަޖައްލާތަކުގައި އެ ކަމަނާގެ ލިޔުއްވުންތައް ވަނީ ޝާއިޢު ކުރައްވާފައެވެ. ހަމައެހެންމެ 1980 ވަނަ އަހަރުން ފެށިގެން ފަތްތޫރަ މަޖައްލާއަށް ވެސް އަގުހުރި ލިޔުންވުންތައް ލިޔުއްވަމުން ގެންދެވިއެވެ.
ޙަބީބާގެ ލިޔުއްވުންތައް ހިމެނޭ ބައެއް ނޫސް މަޖައްލާތައް:
- އަދަބީ ޝުޢޫރު
- ޖިންސުއްލަޠީފް
- ހުވަނދު
- މޫންލައިޓް
- އަމާޒު
- ހިޔަލަ
- ޙަބީބާ ލިޔުއްވި ބައެއް ވާހަކަތައް:
- ފަތްމިނި
- ނައުޝީން
- އަޑު
- ތަޤްދީރުގެ ނިޔާ (ތަރުޖަމާއެއް)
- މަޢާފަށްވުރެ (ތަރުޖަމާއެއް)
ޙަބީބާގެ ފާހަގަކޮށްލެވޭ ބައެއް މަސައްކަތްޕުޅުތަކުގެ ތެރޭގައި ''މުޙަންމަދު ތަކުރުފާނު ދަ ގްރޭޓް'' ގެ ނަމުގައި އިނގިރޭސި ބަހުން ލިޔުއްވި ފޮތާއި, ''ދިވެހި ތާރީޚަށް އަވަސް ކަޅިއެއް'' މި ނަމުގައި އެކުލަވައިލެއްވި ތާރީޚު ފޮތާއި ރެހެންދި ޚަދީޖާގެ މައްޗަށް އުރުދޫ ބަހުން ލިޔުއްވި މަޒުމޫނު ހިމެނެއެވެ.
ޙަބީބާ އަދާކުރެއްވި މަޤާމުތައް:
- މަދްރަސަތުއް ސަނިއްޔާގެ މުޢާވިނާކަން.
- މަދްރަސަތުއް ސަނިއްޔާގެ 2 ނަންބަރު މުދައްރިސާ ކަމާއި, ޚާއްސަ މުދައްރިސާކަން
- މިނިސްޓްރީ އޮފް އެކްސްޓަރނަލް އެފެއާޒްގެ ސެކްރެޓަރީކަން.
- ވާރލްޑް ހެލްތު އޯގަނައިޒޭޝަނާބެހޭ ބައިގެ ސެކްރެޓަރީކަން.
- ޤައުމީ ކުތުބުޚާނާގެ ފުރަތަމަ ލައިބްރަރޭރިއަން.
- ޤައުމީ ކުތުބުޚާނާގެ ޑެޕިއުޓީ ޑިރެކްޓަރު ކަމުގެ މަޤާމު.
- ޤައުމީ ކުތުބުޚާނާގެ ޑިރެކްޓަރ ކަމުގެ މަޤާމު.
- ޤައުމީ ކުތުބުޚާނާގެ ޑިރެކްޓަރ ޖެނެރަލް ކަމުގެ މަޤާމު.
- ޤައުމީ ކުތުބުޚާނާގެ އެސިސްޓެންޓް އެގްޒެކެޓިވް ޑިރެކްޓަރ ކަމުގެ މަޤާމު.
- ޤައުމީ ކުތުބުޚާނާގެ އެގްޒެކެޓިވް ޑިރެކްޓަރ ކަމުގެ މަޤާމު.
- ރައްޔިތުންގެ މަޖިލީހަށް ރައީސުލްޖުމްހޫރިއްޔާ އައްޔަން ކުރެއްވި މެންބަރުކަން.
- ދިވެހިބަހާއި ތާރީޚަށް ޚިދުމަތްކުރާ ޤައުމީ މަރުކަޒަށް ލަފާދޭ މަޖިލީހުގެ މެންބަރުކަން.
- ތާރީޚު ކޮމިޓީގެ މެންބަރުކަން.
ޚަބީބާއަށް ވަނީ ދިވެހި އަދަބިއްޔާތަށް ޚިދުމަތް ކުރުމުގެ ދާއިރާއިން ދިވެހިބަހުގެ ލިޔުންތެރިކަމުގެ ރޮނގުން ޢާންމު ޚިދްމަތުގެ ޝަރަފުވެރިކަމުގެ އިނާމު ވެސް ހާސިލު ކުރައްވައިިފައެވެ.
މީގެއިތުރުން ދިވެހިބަހަށް ތަރުޖަމާ ކުރުމުގެ ރޮނގުން ހިތްވަރު ދިނުމުގެ އިނާމު 1981 ވަނަ އަހަރު ލިބިވަޑައިގަތެވެ. އަދި ހަމައެއާއެކު ''މިނިވަން 25'' ގެ އިނާމާއި, ނޫސްވެރިކަމުގެ ރަން ގަލަންވެސް އެ ކަމަނާއަށް ވަނީ ލިބިވަޑައިގެންފައެވެ.
ދެން ކީއްވެތޯ ނިޝާން ދިޔަމިގިލީ ޝަރަފު ލިބިވަޑައިގަތީ؟