މީޑިއާއަށް މަޢުލޫމާތު ދޭނެ ގޮތް ފުލުހުންނަށް ކިޔައިދީފި
ފުލުހުންގެ ފަރާތުން މީޑިއާތަކާ ޢާންމު ރައްޔިތުންނަށް މަޢުލޫމާތު ދިނުމުގައި ޢަމަލު ކުރާނެ ގޮތް އުނގަންނައި ދިނުމަށް މަސައްކަތު ބައްދަލުވުމެއް ބާއްވަވައިފިއެވެ.
ފުލުހުން ވިދާޅުވި ގޮތުގައި، މިއީ ފުލުހުންގެ ޚިދުމަތުގެ މުވައްޒަފުންނަށް ހާއްސަކޮށްގެން، އޮސްޓްރޭލިއަން ފެޑެރަލް ޕޮލިސް (އޭ.އެފް.ޕީ) ގެ ފަރާތުން ”ސީނިއަރ ޕޮލިސް އެގްޒެކްޓިވް މީޑިއާ ވޯކްޝޮޕް”ގެ ނަމުގައި ކުރިއަށް ގެންދިޔަ މަސައްކަތު ބައްދަލުވުމެކެވެ.
އިސްކަންދަރު ބިލްޑިންގައި މި މަހު 26 އަދި 27 ވަނަ ދުވަހު ކުރިއަށް ގެންދިޔަ މި ވޯކްޝޮޕްގައި، ދިވެހި ފުލުހުންގެ ޚިދުމަތުގެ ފަރާތުން މީޑިއާތަކާއި އާންމު ރައްޔިތުންނަށް މައުލޫމާތު ދިނުމުގައި އަމަލުކުރާނެގޮތުގެ ހުނަރުތައް ދަސްކޮށްދީފައިވެއެވެ.
އެގޮތުން، އާންމު މީޑިއާތަކުގެ ބޭނުން ފުލުހުން ކުރާނެގޮތް، އެކަމުގެ މުހިންމުކަން، މައުލޫމާތު ދިނުމަށް ތައްޔާރުވާނެގޮތް، މީޑިއާ ސްޓްރެޓެޖީސް އަދި އެކި ހާލަތްތަކުގައި މީޑިއާ އަށް މައުލޫމާތުދޭނެ ގޮތުގެ މަޢުލޫމާތުވެސް ހިއްސާކުރައްވައިފައިވެއެވެ.
އޭގެ އިތުރުން، ނޫސްވެރިންގެ ބައްދަލުވުމަކަށް ތައްޔާރުވެ މަޢުލޫމާތުދިނުމުގައި ޢަމަލުކުރާނެގޮތުގެ ހުނަރުތައް ދަސްކޮށްދިނުމާއެކު ބައިވެރިންގެ މެދުގައި ގްރޫޕް ހަރަކާތްތަކެއްވެސް ކުރިއަށް ގެންގޮސްފައިވެއެވެ.
ދިވެހި ފުލުހުންގެ ޚިދުމަތުގެ އެކި ޑިޕާޓްމަންޓުތަކާއި އަތޮޅު ކޮމާންޑަރުން ހިމެނޭހެން 20 މުވައްޒަފުން ބައިވެރިވި މި މަސައްކަތު ބައްދަލުވުމުގައި ޝެޝަންތައް ނަންގަވައިދެއްވީ އޭ.އެފް.ޕީ ގެ ފަރާތުން މީޑިއާ އޮފިސަރ މައިކަލް ވްރޭއެވެ.
މި މަސައްކަތު ބައްދަލުވުން ކުރިއަށް ގެންދިޔައީ ދިވެހި ފުލުހުންގެ ޚިދުމަތުގެ އިންޓަނޭޝަނަލް ރިލޭޝަންސް އަދި ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގެ އެހީތެރިކަމާއެކުގައެވެ.
ކޮންމެ ކަމެއްގައިވެސް އިސްލާމް ދީނުގެ ރިވެތި ހަމަތަކުގެ މަތީން ކަންކުރީމާ ރަގަޅުވާނެ އެންމެ ފުރިހަމަ ދީނަކީ އިސްލާމްދީން !