މުންޑޫގައި ރައީސް ނަޝީދުގެ މަންދޫބުން ނެތި ވޯޓުލާން ފެށި: ހަސަން ލަތީފު
ލ.މުންޑޫގައި ވޯޓުލާން ފެށީ، ރައީސް މުޙައްމަދު ނަޝީދުގެ މަންދޫބުން ނެތި ކަމަށް އެ މަނިކުފާނުގެ އިންތިޚާބީ އެޖެންޓް، ހަސަން ލަތީފު ވިދާޅުވެއްޖެއެވެ.
ހަސަން ލަތީފު މިއަދު ކުރެއްވި ޓްވީޓެއްގައި ވިދާޅުވީ، އެ ރަށުގައި މިއަދު ހެނދުނު 9:00ގެ ކުރިން، ރައީސް ނަޝީދުގެ މަންދޫބުން ނެތި ވޯޓުލާން ފަށައިފައިވާ ކަމަށެވެ. އިތުރު އެއްޗެއް ވިދާޅެއް ނުވެއެވެ.
ގިނަ ސަރަހައްދުތަކުގައި މިއަދު ހެނދުނު 9:00ޖެހިއިރު ވޯޓުލާން ފެށިއިރު، މި އިންތިޚާބުގައި 243 ވޯޓު ފޮށި ބަހައްޓައިފައިވެއެވެ. މި އިލެކްޝަނުގައި 57،257 އެމްޑީޕީ މެމްބަރުންނަށް ވޯޓު ލުމުގެ ހައްޤު ލިބިފައިވެއެވެ.
އެމްޑީޕީގެ ފަރާތުން، މ އަހަރު ރިޔާސީ ރޭހަށް ނުކުންނަވާނެ ބޭފުޅަކު ކަނޑައެޅުމަށް ބާއްވާ މި އިންތިޚާބުގައި ވާދަ ކުރައްވަނީ، ކުރީގެ ގާތް ރަޙްމަތްތެރިން ކަމުގައިވާ، ރައީސް މުޙައްމަދު ނަޝީދާ ރައީސް އިބްރާހީމް މުޙައްމަދު ޞާލިޙެވެ. މިއީ މި ދެ ބޭފުޅުން އިންތިޚާބެއްގައި ވާދަކުރައްވާ އެންމެ ފުރަތަމަ ފަހަރެވެ.
މި އިންތިޚާބު ކައިރިވީއިރު، މި ދެ ބޭފުޅުންގެ ދެ ފެލްޝަނުގެ ކޯޅުން ބޮޑުވެ، އެމްޑީޕީ އޮތީ ވަރަށް ބޮޑަށް ބައިވައިވެފައެވެ.
ރައީސް ނަޝީދު މީގެ ކުރިން އެމްޑީޕީގެ ރިޔާސީ ޕްރައިމަރީގައި ދެ ފަހަރެއްގެ މަތިން ވާދަ ކުރެއްްވިއެވެ. އެއީ 2008، އަދި 2013 ވަނަ އަހަރެވެ. އެ ދެ ފަހަރުވެސް އެ މަނިކުފާނު ކާމިޔާބު ހޯއްދެވިއެވެ.
