އާސިރު ފެނުނީ އެއާޕޯޓު ޓާމިނަލް ތެރެއިން: ފުލުހުން
މާލެއިން ގެއްލިގެން ހޯދަމުންދިޔަ ސ. މަރަދޫފޭދޫ، ގަސްކަރަ، މުހައްމަދު އާސިރު އިސްމާއިލް (31އ) ފެނުނީ ވެލާނާ އިންޓަނޭޝަނަލް އެއާޕޯޓުގެ ޓާމިނަލް ތެރެއިން ކަމަށް ފުލުހުން ބުނެފިއެވެ.
އާސިރު ފެނިފައިވަނީ ގެއްލިގެން ހޯދަމުންދާތާ 13 ދުވަސް ފަހުންނެވެ. އޭނާ ފެނުނު ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވީ މިދިޔަ ބުރާސްފަތި ދުވަހުގެ ރެ އެވެ.
އާސިރު، 31، ފެނުނުކަން ޔަގީންކޮށް ދެމުން އެ ރޭ ފުލުހުން ބުނީ އޭނާ ފެނުނުއިރު ހާލު ރަނގަޅު ކަމަށެވެ.
އާސިރު ގެއްލުނު މައްސަލައިގައި ފުލުހުން އާއްމު ކުރި ބަޔާނެއްގައި ބުނެފައިވަނީ އާސިރު އެންމެ ފަހުން ފެނުނީ ހުޅުމާލޭގެ ފެރީ ޓާމިނަލް ކައިރިން ހުދު ކުލައިގެ ކާރަކަށް އަރައިގެން ގޮސް ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ޓާމިނަލަށް ވަދެގެން ދާ މަންޒަރު ކަމަށެވެ. އަދި އޭނާ ހޯދަން މާލޭގެ އެކި ސަރަހައްދުތަކާއި ވީއައިއޭގެ ޓީއެމްއޭގެ ކެމެރާތައް އަދި އެއާޕޯޓް ފެރީ ހުންނަ ސަރަހައްދުގައި ހުރި ހުރިހާ ކެމެރާތަކުން 150 ގަޑިއިރުގެ ފުޓޭޖް ބަލާފައިވާ ކަމަށް ފުލުހުން ބުންޏެވެ.
