ގިފިލި ބަލައި،ވީޑިއޯ ކުރި މީހަކަށް 28،000 ރުފިޔާގެ ޖޫރިމަނާއެއް
އަންހެނަކު ފެންވަރަން ހުއްޓައި ގިފިލި ބަލައި، ފެންވަރާ މަންޒަރު ވީޑިއޯ ކުރި މީހަކު ޖޫރިމަނާ ކޮށްފިއެވެ.
ިމިކަން ހިނގާފައިވަނީ ހއ.ފިއްލަދޫގައެވެ. މި މައްސަލައިގައި ހިމެނޭ ފިރިހެންމީހާގެ މައްޗަށް ދަޢުވާ ކުރީ، އެނގިހުރެ ހުއްދަ ނޫން ތަނަކަށް ވަނުމުގެ ދަޢުވާއެވެ.
އެ މީހާގެ މައްޗަށް އެ ދަޢުވާ ކުރީ 2021 ވަނަ އަހަރުގެ މާޗުމަހުގެ ހަތް ވަނަ ދުވަހުގެ ރޭ، ގެއެއްގައި 11:30 އެހާކަންހާ އިރު އަންހެން ކުއްޖަކު ފެންވަރަށް ހުއްޓައި ފެންލައިޓުން ބަލައި އަދި އަންހެން ކުއްޖާ ފެންވަރާ މަންޒަރު ފޯނުން ރިކޯޑް ކުރި މައްސަލައިގައެވެ.
މި މައްސަލައިގެ ތަހުޤީޤު މަރުހަލާގައި އެ މީހާ ކުށަށް އިއުތިރާފުވި ނަމަވެސް ޝަރީޢަތުގައި އޭނާ އެކަމަށް އިންކާރުކޮށްފައިވެއެވެ.
އޭނާގެ މައްޗަށް ކުށް ސާބިތުވެފައިވަނީ، ދައުލަތުން ހުށަހެޅި ހެކި ބަހަށް ބިނާކޮށެވެ.
އެ މީހާ ކުރި ކުށުގެ އަދަބަކީ ހަތަރު މަހާއި 24 ދުވަހަށް ޖަލަށް ލުމެވެ. ނަމަވެސް ޤާޟީ ނިންމެވީ އޭނާ 28،000 ރުފިޔާއިން ޖޫރިމަނާ ކުރާށެވެ.
އެ ފައިސާ އޭނާ ދައްކަން ޖެހެނީ މީރާއަށެވެ. ޤާޟީ ޙުކުމް ކުރައްވައިފައިވަނީ، ކޮންމެ މަހަކު މަދުވެގެން 4،800 ރުފިޔާ މީރާއަށް ދައްކައި ހަލާސް ކުރުމަށެވެ.
Ads by STO
