ހެމްބާގް ބަޑީގެ ހަމަލާ: މަރުވި މީހުންގެ ތެރޭގައި މާބަނޑު އަންހެނެއް
ޖަރުމަނުގެ އުތުރުގެ ސިޓީއެއް ކަމަށްވާ ހެމްބާގްގައި ހުންނަ ޖެހޯވާގެ މީޓިން ހޯލެއްގައި ބަޑިޖެހުމުގެ ސަބަބުން މަރުވި މީހުންގެ ތެރޭގައި މާބަނޑު އަންހެނެއް ހިމެނޭ ކަމަށް އޮފިޝަލުން ބުނެފިއެވެ.
މަރުވި މީހާގެ ބަނޑުގައިވާ ދަރިފުޅުވެސް ވަނީ މަރުވެފައިކަމަށާއި އޭނާގެ ބަނޑަށް ހަތް މަސްކަމަށް އެގައުމުގެ ފުލުހުން ބުނެއެވެ. ހެމްބާގްގެ ޗީފް އޮފް ޕޮލިސް ވިދާޅުވި ގޮތުގައި މިހަމަލާ ދިން މީހާއަކީ ޑިސެމްބަރު މަހުން ފެށިގެން ގާނޫނީ ހުއްދައާއެކު ސެމީ އޮޓޮމެޓިކް ފިސްތޯލަ ގެންގުޅޭ މީހެކެވެ.
މިހަމަލާ ދިން މީހާވަނީ ނުވަ މެގަޒިންގެ ވަޒަން ޖަހާފައިކަމަށާއި ހަމަލާ ދިން ވަގުތު އެ ހޯލުގައި 50 މީހުން ތިބި ކަމަށް ފުލުހުން ބުނެއެވެ. ހަމަލާ ދިނުމަށްފަހު އެމީހާ ވަނީ އަމިއްލައަށް މަރުވެފައެވެ.
މިހަމަލާގެ ސަބަބުން ކުއްލި ސިހުމެއް ލިބިފައިވާއިރު ހަމަލާ ދެމުން ދިޔަ މަންޒަރު ފެނުނު މީހުން އިސްނަގައިގެން އެމީހުންގެ އަތުގައި އެއްވެސް ފޮޓޯއެއް ނުވަތަ ވީޑިއޯއެއް ހުރި ނަމަ އެކަމަށް ހާއްސަ ވެބްސައިޓަކަށް އަޕްލޯޑް ކުރުމަށް އެގައުމުގެ ފުލުހުން ވަނީ މިހާރު އަންގައިފައެވެ.
ފާއިތުވި އަހަރުތަކުގައި ޖަރުމަނުވިލާތުގައި ހިނގި ހަމަނުޖެހުންތަކާއި ބަޑީގެ ހަމަލާތަކުގެ ސަބަބުން އެގައުމުގައި ވަނީ ހަލަބޮލިކަން އިތުރުވެފައެވެ. މިގޮތުން 2020 ވަނަ އަހަރުގެ ފެބްރުއަރީ މަހުގެ ތެރޭގައި ޖަރުމަރުގެ ހުޅަނގުގެ އަވަށެއް ކަމަށްވާ ހަނާއުގައިވެސް މިފަދަ ހާދިސާއެއް ހިނގައި ނުވަ މީހަކު ވަނީ ބަޑިޖަހައި މަރާލާފައެވެ.
