ލަންކާ ވަޒީރުގެ ވާހަކައަށް މައުސޫމް ރައްދު ދެއްވައިފި
ރާއްޖޭގެ ފަތުރުވެރިކަމަށް ވަރަށް ބޮޑަށް ފާޑުވިދާޅުވެ، ލަންކާގެ ފަތުރުވެރިކަމާ ބެހޭ ވަޒީރު، ފެނާންޑޯ ހަރިން މިދިޔަ ހަފްތާގައި އައިޓީބީ ބާލިން ފެއާގައި ދެއްކެވި ވާހަކައަށް ރާއްޖޭގެ ޓޫރިޒަމް މިނިސްޓަރު ޑރ. މައުސޫމް ރައްދު ދެއްވައިފިއެވެ.
އައިޓީބީ ފެއާގައި ނޫސްވެރިންނާ ބައްދަލުކުރައްވައި، ލަންކާގެ ފަތުރުވެރިކަމާ ބެހޭ ވަޒީރު ވަނީ ރާއްޖޭގައި އޮންނަނީ ހަމައެކަނި ގޮނޑުދޮށްތައް ކަމަށާއި ރާއްޖޭގައި ފަސް ދުވަހު މަޑުކޮށްލާއިރަށް ފޫހިވާނެ ކަމަށް ވިދާޅުވެފައެވެ.
އަދި ރާއްޖެއަށް އަންނަ ފަތުރުވެރިންނަށް މާ ގިނަ ތަޖުރިބާތަކެއް ނުކުރެވޭއިރު، ލަންކާއިން ގިނަ ކަންކަން ތަޖުރިބާ ކުރެވޭނެ ކަމަށް ވެސް ވިދާޅުވިއެވެ.
ފެނާންޑޯގެ ވާހަކައަށް ނުސީދާކޮށް ރައްދު ދެއްވައި، ފެނާންޑޯ މިނިސްޓަރު މައުސޫމް ވިދާޅުވީ، ވޯލްޑް ޓްރެވަލް އެވޯޑްސް އިން ދޭ ދުނިޔޭގެ ލީޑިން ޓޫރިސްޓް ޑެސްޓިނޭޝަންގެ ލަގަބު 2020، 2021، އަދި 2022ގައި ހޯދާފައިވާ ދިވެހި ރާއްޖެއަކީ ދުނިޔޭގެ ފެންވަރުގެ ފަތުރުވެރިކަމުގެ ބެންޗްމާކް ކަމަށެވެ.
ރާއްޖެއަކީ ބެސްޓް އަދި އެޑިކްޓިވް މަންޒިލަކަށް ހަދައިދިން ޑިވެލޮޕަރުންނާ ހިދުމަތް ދޭ ފަރާތްތަކަށް ޝުކުރު އަދާކުރައްވައި މިނިސްޓަރު ވަނީ "ހަސަދަވެރިވެ، ޝައްކު އުފެދޭ ނަމަ ލޯގަނޑާ ސުވާލުކުރައްވާ" މިފަދައިން ލިޔުއްވައި، ފެނާންޑޯއަށް ނުސީދާ ރައްދެއް ދެއްވައިފައެވެ.
ފެނާންޑޯގެ ވާހަކައަށް ދިވެހީންގެ އިތުރުން، ދުނިޔޭގެ އެކި ޤައުމުތަކުގެ މީހުންގެ ފާޑުކިޔުން ވެސް އަމާޒުވިއެވެ. އެގޮތުން، ބައެއް މީހުން ވަނީ، އެހެން ޤައުމުތަކަށް ފާޑު ނުކިޔައި ވެސް، އަމިއްލަ ޤައުމު ޕްރޮމޯޓު ކުރެވިދާނެ ކަމަށް ބުނެ ފާޑު ކިޔައިފައެވެ.
