އެމްޑީއޭއާ އަދާލަތާއެކު އިންތިޚާބު ކާމިޔާބެއް ނުކުރެވޭނެ: ވައްޑެ
އެމްޑީއޭ އާއި އަދާލަތާއި އެކު ރައީސް އިބަރާހީމް މުޙައްމަދު ޞާލިޙަށް މި އަހަރުގެ ރިޔާސީ އިންތިޚާބު ކާމިޔާބު ނުކުރެއްވޭނެކަން ހުދު އެ މަނިކުފާނުވެސް ޤަބޫލު ކުރައްވާ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު ވިދާޅުވެއްޖެއެވެ.
ވައްޑެ މިގޮތަށް ވިދާޅުވީ ރައީސް ޞާލިޙުގެ ލީޑަރޝިޕްގެ ދަށުން އަދާލަތު ޕާޓީ އަދި އެމްޑީއޭ އާއެކު ފަސޭހަކޮށް ރިޔާސީ އިންތިހާބު ކާމިޔާބު ކުރެވޭނެ ކަމަށް ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވުމާ ގުޅިގެން އެކަމަށް ރައްދު ދެއްވައި ކުރެއްވި ޓުވީޓެއްގައެވެ.
“ތީ އިންތިހާބު ކާމިޔާބު ކުރެވޭ ސައިޒު ކޯލިޝަނެއް ކަމަށް ހުދު ރައީސް ސާލިޙުވެސް ޤަބޫލު ނުކުރައްވާ“ ވައްޑެ ވިދާޅުވިއެވެ.
ވައްޑެ އިތުރަށް ވިދާޅުވީ އެމްޑީއޭ އާއި އަދާލަތުގެ އާއްމު ގިނަ މެންބަރުން ތިބި ގޮތް ވެސް ރައީސް ޞާލިޙުއަށް ގައިމުވެސް އެނގިވަޑައިގަންނަވާނެ ކަމަށެވެ.
ޖޭޕީން މި އަހަރުގެ ރިޔާސީ އިންތިޚާބުގައި ވަކިން ވާދަ ކުރަން ނިންމިއިރު، އެ ޕާޓީއަށް ކޯލިޝަންގެ ދަޢުވަތު، ރައީސް ޞާލިޙުގެ ފެކްޝަނުން އޮތީ ދީފައެވެ.
