ކުރެންދޫގައި 50 ހައުސިން ހުނިޓު އަޅަން ބަޔަކާ ހަވާލު ކޮށްފި
ޕަބްލިކް ސެކްޓާ އިންވެސްޓުމަންޓު ޕްރޮގްރާމް (ޕީއެސްއައިޕީ) ގެ ދަށުން ޅ. ކުރެންދޫގައި 50 ހައުސިން ޔުނިޓު ޑިޒައިންކޮށް އެޅުމަށް އެސްޖޭ ޓްރޭޑް ޕްރައިވެޓް ލިމިޓެޑާ ހަވާލުކޮށްފިއެވެ.
މި މަޝްރޫޢުގެ އެއްބަސްވުމުގައި ޕްލޭނިން މިނިސްޓްރީ ފަރާތުން ސޮއިކުރެއްވީ ހައުސިން ޑިޕާޓްމަންޓުގެ ޑިރެކްޓަރު ޖެނެރަލް އަހުމަދު ވިޝާން ނަސީމެވެ. އަދި އެސްޖޭގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރު ޝިހާދު އިބްރާހީމެވެ.
ޕްލޭނިން މިނިސްޓްރީން ވިދާޅުވީ އެ މަސައްކަތް ހަވާލުކުރީ ޑިޒައިން އެންޑް ބިލްޑް އުސޫލުން ކަމަށެވެ.
އެސްޖޭ ކުންފުންޏާ މި މަޝްރޫޢު ހަވާލުކޮށްފައިވަނީ ޖުމްލަ 270 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
ޕްލޭނިން މިނިސްޓްރީން ވިދާޅުވި ގޮތުގައި 1000 އަކަ ފޫޓުގެ މި ހައުސިން ޔުނިޓުތައް އަޅާނީ ފަންގިފިލާތަކަށް ނެގޭ ބިލްޑިންގެއްގައެވެ. އަދި، ކޮންމެ އެޕާޓްމެންޓެއްގައި ތިން ކޮޓަރި އާއި ތިން ފާހާނާގެ އިތުރުން ސިޓިން ރޫމް، ބަދިގެ، ކާގެ އަދި ލޯންޑްރީ އާއި ގުދަނެއް ވެސް ހުންނާނެއެވެ.
އޭގެ އިތުރުން، އެ ފުލެޓުތަކުގައި އުޅޭ މީހުންނަށް ރަނގަޅު މާހައުލެއް ފޯރުކޮށްދިނުމުގެ ބޭނުމުގައި ޕާކިން އޭރިއާއެއްގެ އިތުރުން ޕާކެއް ގާއިމުކޮށް، އިމާރާތުގެ ވަށައިގެން އަލިކަން ގާއިމުކުރާނެ ކަމަށް ވެސް މިނިސްޓްރީން ހާމަކުރައްވައެވެ.
Ads by STO
