ޗައިނާއިން ބޯޑަރު އެއްބަސްވުންތަކާ ހިލާފުވެފައިވާ ކަމަށް އިންޑިއާއިން ތުހުމަތުކޮށްފި
އިންޑިއާގެ ދިފާއީ ވަޒީރު ތުހުމަތު ކުރައްވާ ގޮތުގައި ޗައިނާއިން ދެ ގައުމުގެ ދެމެދުގައި ވެފައިވާ އެއްބަސްވުންތަކާ ހިލާފުވެގެން ދެ ގައުމުގެ ގުޅުމުގެ "މުޅި އަސާސް" ނަގާލާފައިވާ ކަމަށާއި މިއީ އިރުމަތީ ލަޑާކް ސަރަހައްދުގައި އެ ގައުމުގެ ހިޔާލު ތަފާތުވެފައިވާ ބޯޑަރު ސަރަހައްދުގައި ތިބި އެތައް ހާސް ސިފައިންތަކެއް ބައިވެރިކޮށްގެން ގާތްގަނޑަކަށް ތިން އަހަރެއްހާ ދުވަސް ވަންދެން ހިނގި ހަމަނުޖެހުންތަކަށް އިޝާރާތް ކުރައްވާ ފައިވާ ކަމެކެވެ.
އިންޑިއާގެ ޑިފެންސް މިނިސްޓަރު ރާޖްނާތު ސިންގް ޗައިނާގެ ޑިފެންސް މިނިސްޓަރު ލީ ޝަންގްފޫއާ ބައްދަލުކުރައްވައި އިންޑިއާ-ޗައިނާ ބޯޑަރު ސަރަހައްދުގައި ހިނގަމުންދާ ކަންތައްތަކާއި ދެގައުމުގެ ގުޅުމާ ބެހޭ ގޮތުން ވަރަށް ސާފުކޮށް މަޝްވަރާ ކުރެއްވި ކަމަށް އިންޑިއާގެ ދިފާއީ ވުޒާރާއިން ބުރާސްފަތި ދުވަހު ބުނެފި އެވެ.
ސިންގް ލީއަށް ވިދާޅުވީ އިންޑިއާ އާއި ޗައިނާއާ ދެމެދު އޮންނަ ގުޅުން ބަދަހިވަނީ ބޯޑަރުތަކުގައި ސުލްހަ މަސަލަސްކަން ފެތުރުމުގެ މައްޗަށް ކަމަށާއި ބޯޑަރުގެ ހުރިހާ މައްސަލަތަކެއް ހައްލުކުރަން ޖެހޭނީ މިހާރު ވެފައިވާ އެއްބަސްވުންތަކާއި ވައުދުތަކާ އެއްގޮތްވާ ގޮތުގެ މަތިން ކަމަށެވެ.
މި މަޝްވަރާތަކާ ގުޅޭ ގޮތުން ޗައިނާގެ ފަރާތުން އަދި ވަކި އެއްޗެއް ބުނެފައެއް ނުވެއެވެ.
އިންޑިއާއިން ބުނަނީ ގިނަ އަދަދެއްގެ ޗައިނާ ސިފައިން ބޭތިއްބުމާއި އެމީހުންގެ ހަރުކަށި އަމަލުތަކާއި ބޯޑަރުގެ ހާލަތަށް އެއްފަރާތަކުން ބަދަލު ގެންނަން މަސައްކަތް ކުރުމަކީ ދެ ގައުމުގެ މެދުގައި ވެފައިވާ އެއްބަސްވުންތަކާ ހިލާފު ކަމެއް ކަމަށެވެ. ސިންގް ވިދާޅުވީ އެ ގަވާއިދާ ހިލާފުވުމުގެ ސަބަބުން ދެގައުމުގެ ގުޅުމުގެ މުޅި އަސާސް ގެއްލުވާލާފައިވާ ކަމަށެވެ.
މީގެ ތިން އަހަރު ކުރިން ލަޑަކް ސަރަހައްދުގައި ހިނގި ހަމަނުޖެހުންތަކުގައި އިންޑިއާގެ 20 ސިފައިންނާއި ޗައިނާގެ ހަތަރު މީހަކު ވަނީ މަރުވެފަ އެވެ. ހަރުކަށި ފަރުބަދަމަތީ ސަރަޙައްދުގައި ޒަމާނުއްސުރެ ހިނގަމުން ދިޔަ ހަމަނުޖެހުންތަކަކަށް ބަދަލުވެ، ކޮންމެ ފަރާތަކުންވެސް އެތައް ހާސް ސިފައިންނެއް އާޓިލަރީއާއި ޓޭންކްތަކާއި ފައިޓަރ ޖެޓްތަކުގެ އެހީތެރިކަމާއެކު ތިއްބެވެ.
ލީގެ ދަތުރުފުޅުގެ ދުވަސްތަކެއް ކުރިން އިންޑިއާ އާއި ޗައިނާގެ އަސްކަރިއްޔާގެ އިސް ކޮމާންޑަރުން ވަނީ ނުތަނަވަސްކަން އުފެދިފައިވާ ސަރަހައްދުތަކުން ސިފައިން ބޭލުމުގެ މަސައްކަތް ކުރުމުގެ ގޮތުން 18 ވަނަ ބުރުގެ މަޝްވަރާތަކެއް ބާއްވައިފަ އެވެ.
ޕެންގޮންގް ސޯ، ގޯގްރާ އަދި ގަލްވާން ވާދީގެ އުތުރާއި ދެކުނު އައްސޭރީގެ ބައެއް ސަރަހައްދުތަކުން އިންޑިއާ އާއި ޗައިނާއިން ސިފައިން އަނބުރާ ގެންގޮސްފައިވީ ނަމަވެސް، މަލްޓި ޓަޔަރ ޑިޕްލޮއިމަންޓްގެ ދަށުން އިތުރު ސިފައިން ބަލަހައްޓަމުން ގެންދެއެވެ.
"ލައިން އޮފް އެކްޗުއަލް ކޮންޓްރޯލް" އަކީ ހުޅަނގުގައި އޮންނަ ލަޑަކް އިން ފެށިގެން އިންޑިއާގެ އިރުމަތީ ސްޓޭޓެއް ކަމަށްވާ އަރޫނާޗަލް ޕްރަދޭޝްއާ ދެމެދު ޗައިނާ އާއި އިންޑިއާގެ ބާރުގެ ދަށުގައި ވާ ސަރަހައްދުތައް ވަކިކުރާ ސަރަހައްދެކެވެ. އިންޑިއާ އާއި ޗައިނާގެ ބޯޑަރުގެ މައްސަލާގައި 1962 ވަނަ އަހަރު ވަނީ ހަނގުރާމައެއް ކޮށްފަ އެވެ.
ޑިފެންސް މިނިސްޓަރު ލީ ނިއުދިއްލީއަށް ކުރައްވަމުން ގެންދަވާ ދަތުރުފުޅަކީ ޝަންހާއީ ކޯޕަރޭޝަން އޯގަނައިޒޭޝަންގެ ޑިފެންސް ޗީފްގެ ބައްދަލުވުމެއްގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. މި ގްރޫޕުގައި ހިމެނެނީ ޗައިނާ، އިންޑިއާ، ޕާކިސްތާން، ރަޝިއާ، ކަޒަކިސްތާން، ކިރްގިސްތާން، ތަޖިކިސްތާން އަދި އުޒްބެކިސްތާނެވެ.
