މެކްސިކޯއަށް ޗައިނާއިން ފެންޓަނިލް ޓްރެފިކް ކުރާ ކަމުގެ ތުހުމަރު
މެކްސިކޯގެ މަސްތުވާތަކެތީގެ ވަގު ވިޔަފާރި ކުރާ ގޭންގުތަކަށް ގަވާއިދާ ހިލާފަށް ފެންޓަނިލް ފޮނުވަނީ ޗައިނާއިންކަން ކަށަވަރުވާ ހެކި ޗައިނާއަށް ދައްކާނެ ކަމަށް މެކްސިކޯއިން ބުނެފި އެވެ.
ފެންޓަނިލް ޓްރެފިކް ކުރަނީ ޗައިނާއިން ނޫން ކަމަށް ޗައިނާގެ ސަރުކާރުން ބުނެ އެވެ. އެކަމާ ގުޅިގެން ހުކުރު ދުވަހު މެކްސިކޯގެ ރައީސް އަންދްރޭސް މެނުއެލް ލޮޕޭޒް އޮބްރާޑޯ ވިދާޅުވީ އެކަމުގެ ހެކި ޗައިނާއަށް ދައްކާނެ ކަމަށެވެ.
ދާދި ފަހުން ޗައިނާއިން މެކްސިކޯއަށް ފޮނުވި ކޮންޓެއިނަރެއްގެ ތެރޭގައި ފެންޓަނިލް ހުރި ކަމަށް އޮބްރާޑޯ ވިދާޅުވި އެވެ. ފެންޓަނިލްއަކީ އޮޕިއޮއިޑް ބާވަތުގެ ސިންތެޓިކް މަސްތުވާ އެއްޗެކެވެ. އޭގެ ސަބަބުން އެމެރިކާގައި ވަނީ މަސްތުވާތަކެތީގެ ކާރިސާއެއް އުފެދިފަ އެވެ.
"އަޅުގަނޑުމެންގެ އަތުގައި ހެކި އެބަހުރި،" އޮބްރާޑޯ ވިދާޅުވި އެވެ. އޭނާ މިދިޔަ މާޗް މަހު ޗައިނާގެ ރައީސް ޝީ ޖިންޕިންއަށް ފޮނުއްވި ސިޓީއެއްގައި ވެސް އެދިވަޑައިގެންނެވީ ޗައިނާއިން ފެންޓަނިލް ޓްރެފިކް ކުރުން ހުއްޓުވުމަށް އެހީވެދިނުމަށެވެ.
އެ ސިޓީއަށް ރައްދުދެމުން ޗައިނާގެ ފޮރިން މިނިސްޓްރީން ބުނީ ޗައިނާއިން މެކްސިކޯއަށް ގަވާއިދާ ހިލާފަށް ފެންޓަނިލް ނުފޮނުވާ ކަމަށެވެ.
އެމެރިކާގެ ޑްރަގް އެންފޯސްމަންޓް ޑިޕާޓްމަންޓުން ބުނާ ގޮތުގައި ކުށްވެރިންގެ ގްރޫޕްތަކުން ފެންޓަނިލް އުފައްދަން ބޭނުންވާ ކެމިކަލް މެކްސިކޯއަށް ފޮނުވަނީ ޗައިނާއިން ކަމަށެވެ. އެ ކެމިކަލް ބޭނުންކޮށް، މެކްސިކޯގައި ފެންޓަނިލް އުފެއްދުމަށް ފަހު، ވަގަށް އެތެރެކުރަނީ އެމެރިކާއަށެވެ.
އެހެން ނަމަވެސް، ފެންޓަނިލް އުފައްދަނީ މެކްސިކޯގެ ފަސްގަނޑުގައި ކަމަށް ބުނާ ވާހަކަ މެކްސިކޯއިން ދޮގުކުރެ އެވެ.
ފެންޓަނިލްގެ ސަބަބުން އޯވާޑޯޒްވެ، ގިނަ އަދަދެއްގެ މީހުން ކޮންމެ ދުވަހަކު ވެސް އެމެރިކާގައި މަރުވަމުންދާ އިރު، އިދިކޮޅު ރިޕަަބްލިކަން ޕާޓީގެ އިސް މެމްބަރުން ގޮވާލަނީ މެކްސިކޯގެ ގޭންގުތަކަކީ ޓެރަރިސްޓު ގްރޫޕުތަކެއް ކަމަށަ ކަނޑައަޅައި އެ މީހުންނާ ދެކޮޅަށް ސިފައިން ފޮނުވުމަށެވެ.
