ޤައުމު ދަރަނިން ސަލާމަތް ކުރަން، އަޅުގަނޑުމެންނާ ބައިވެރިވެވަޑައިގަންނަވާ: ޤާސިމް

ދަރަނިން ސަލާމަތްވެފައިވާ ޤައުމަކަށް، ދިވެހިރާއްޖެ ހެދުމަށް ޖުމްހޫރީ ޕާޓީ(ޖޭޕީ)އާއި ގުޅިގެން އަންނަ ރިޔާސީ އިންތިޚާބު ކާމިޔާބު ކުރުމަށް މަސައްކަތް ކުރުމަށް ވީހައިވެސް ގިނަ ބަޔަކު އެ ޕާޓީއާ ގުޅުމަށް އެ ޕާޓީގެ ލީޑަރު އަދި ރިޔާސީ ކެންޑިޑޭޓް ޤާސިމް އިބްރާހިމް ގޮވާލައްވައިފިއެވެ.

Ads by STELCO

ޤާސިމް މިކަމަށް ގޮވައިލެއްވީ، އިތުރު 282 މީހަކު ޖުމްހޫރީ ޕާޓީއާ އަލަށް ގުޅުމުން އެކަމަށް މަރުޙަބާ ވިދާޅުވެ ފޮނުއްވި މެސެޖެެއްގައެވެ.

ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރުކަންވެސް ކުރައްވަމުން ގެންދަވާ ޤާސިމް ވަނީ ޤައުމަށް ތަރައްޤީއާއި ހަމަޖެހުން ގެނައުމަށް ދިވެހި ރައްޔިތުން އެމަނިކުފާނާއި ބައިއަތު ހިފުމަށް އެދިވަޑައިގެންފައެވެ.

”ޤައުމުގެ ކުރިމަގު އުޖާލާކޮށް، ރައްޔިތުންނަށް ހަމަޖެހުމާއި ތަރައްޤީ ގެނެސް، ދަރަނިން ސަލާމަތްވެފައިވާ ޤައުމަކަށް ދިވެހި ގައުމު ހެދުމަށް، އަޅުގަނޑުމެންނާއެކު ކުރިއަށް އޮތް ރިޔާސީ އިންތިޚާބުގައި ވީހާވެސް ގިނަ ރައްޔިތުން ބައިވެރިވެ ވަޑައިގެން ދެއްވުން އެދެން.“ ޤާސިމް ވިދާޅުވިއެވެ.

މި ސަރުކާރު ކޯލިޝަނުގައި ހިމެނޭ ޖޭޕީން، ރައީީީސް އިބްރާހީމް މުޙައްމަދު ޞާލިޙާއެކު ކޯލިޝަން ނުހަދައި، 2023 ވަނަ އަހަރުގެ ރިޔާސީ އިންތިޚާބުގައި ވާދަ ކުރަން ނިންމިއިރު، އެ ޕާޓީން ވަނީ ސިޔާސީ ޕާޓީތަކަށް، ކޯލިޝަން ހެދުމަށް ދަޢުވަތު ދީފައެވެ.

ޖުމުހޫރީ ޕާޓީއާއި އަލަށް ގުޅުނު 282 މެމްބަރުންނަކީ އއ.ތޮއްޑޫ ދާއިރާއިންނާއި މަތިވެރި ދާއިރާއިންނާއި ހއ.ދިއްދޫ ދާއިރާއިންނާއި ހދ.މަކުނުދޫ ދާއިރާއިންނާއި ގަލޮޅު އުތުރު ދާއިރާއިންނާއި ރ.އުނގޫފާރު ދާއިރާއިންނާއި ރ.ދުވާފަރު ދާއިރާއިންނާއި މާފަންނު ހުޅަނގު ދާއިރާއިންނާއި ށ.ކަނޑިތީމު ދާއިރާއިން ގުޅުނު މީހުންނެެވެ.