ވައްޑޭ ވިދާޅުވަނީ، ކަނޑުން ބައެއް ގެއްލުނުއިރު، ރައީީސް ޞާލިޙު ދިފާޢުގައި ކަމެއް ނުކުރައްވާ ކަމަށް
ރާއްޖޭގެ ކަނޑުގެ ސަރަޙައްދުން ބައެއް ގެއްލިގެން ދިޔައިރު، ރައީސް އިބްރާހީމް މުޙައްމަދު ޞާލިޙު، ދިފާޢުގައި އެއްވެސް ކަމެއް ނުކުރައްވާ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު(ވައްޑޭ) ވިދާޅުވެއްޖެއެވެ.
ވައްޑޭ މިހެން ވިދާޅުވީ، ޗާގޯސް މައްސަލައިގައި ސަރުކާރަށް ފާޑުވިދާޅުވެ، ކުރައްވައިފައިވާ ޓްވީޓެއްގައެވެ.
ރާއްޖެއާ މޮރިޝަސްގެ ކަނޑުގެ ސަރަޙައްދުން، ފުށުއަރާ ސަރަޙައްދު ދެ ބަޔަށް ބެހުމުން، ކަނޑުގެ 45،000 އަކަ ކިލޯމީޓަރު ގެއްލިފައިވާ ކަމަށް ސަރުކާރާ އިދިކޮޅު ފަރާތްތަކުން ބުނެއެވެ. އަދި ކަނޑުން ބައެއް ގެއްލުނީ، ޗާގޯޯސްގެ ސިޔާދަތީ ބާރު، މޮރިޝަސްއަށް ލިބިގެންވާ ކަމަށް ޤަބޫލު ކުރައްވައި، ރައީސް ޞާލިޙު، މޮރިޝަސްގެ ބޮޑުވަޒީރަށް ފޮނުއްވި ސިޓީފުޅުގެ ސަބަބުން ކަމަށްވެސް އެ ފަރާތްތަކުން ބުނެއެވެ.
ވައްޑޭ ވިދާޅުވީ، ރައީސް ޞާލިޙު، ވެރިކަމުގެ ހުވަޔާއި ޚިލާފަށް ޢަމަލު ކުރައްވައިފައިވާ ކަމަށެވެ. އޭނާގެ ޓްވީޓުގައި، ރައީސް ޞާލިޙު ކުރެއްވި ހުވާގެ އެއްބައި ފެންނަ ވީޑިއޯ ކްލިޕެއް ވެސް ހިއްސާ ކުރެއްވިއެވެ.
ވައްޑޭ މިފަދައިން ވިދާޅުވިއިރު، އޭނާ އަކީ "ކަނޑު ވިއްކާލުމާ ދެކޮޅު ކޯލިޝަން"ގައި ހަރަކާާތްތެރިވެވަޑައިގަންނަވާ ބޭފުޅެކެވެ.
އޭނާ ހިމެނިވަޑައިގަންނަވާ "ފިކުރެއްގެ ދިރުން" ފެކްޝަނުން، އައު ސިޔާސީ ޕާޓީއެއް އުފެއްދުމުގެ މަސައްކަތް ކުރަމުން އަންނައިރު، އެ ޕާޓީ ރަޖިސްޓްރީ ކުރުމަށް މިއަދު ހުށަހަޅާނެއެވެ.
