ޗާގޯޯސްގެ ވާަހަކަ ދައްކަނީ ރާއްޖެއަށް ދީނީ މިނިވަންކަން ގެންނަން: ނިހާދު
ޗާގޯސް ނުވަތަ ފޯޅަވަހީގެ ވާހަކަ ދައްކަނީ ރާއްޖެއަށް ދީނީ މިނިވަންކަން ގެނައުމަށް ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުޙައްމަދު ނިހާދު ވިދާޅުވެއްޖެއެވެ.
ނިހާދު މިހެން ވިދާޅުވެފައިވަނީ، ކުރެއްވި ޓްވީޓެއްގައެވެ. ރާއްޖެއާ މޮރިޝަސްގެ ފުށުއަރާ ކަނޑުގެ ސަރަހައްދުގެ އިން ކަނޑައެޅުމުން، ރާއްޖޭގެ ދެކުނުގެ މަސް ކަނޑުން ބައެއް ގެއްލިފައިވާ ކަމަށާއި، އެކަން ހިނގައިފައިވަނީ، ޗާގޯސްގެ ސިޔާދަތީ ބާރު، މޮރިޝަސްއަށް ލިބިގެންވާ ކަމަށް ޤަބޫލުކުރައްވައި، ރައީސް އިބްރާހީމް މުޙައްމަދު ޞާލިހު، މޮރިޝަސްގެ ބޮޑުވަޒީރަށް ފޮނުއްވި ސިޓީފުޅާ ގުޅިގެން ކަމަށް އިދިކޮޅު ފަރާާތްތަކުން ބުނެއެވެ.
މި މައްސަލައިގައި ސަރުކާރު ދިފާޢު ކުރައްވަވައި، ނިހާދު ވިދާޅުވީ، ޗާގޯސް ވާހަކަ އަކީ، ރާއްޖެއަށް ދީނީ މިނިވަންކަން ގެނައުމަށް ހިންގާ ޖަރީމާއެއް ކަމަށެވެ.
"ޗާގޯސް ރާއްޖޭގެ ތަނަކަށްވާ ހިސާބުން، ފައްޅި އަޅަން ހުއްދަ ދިނުން މަޖުބޫރުވާނެ. އެ ނުބައި މަޤްޞަދުގައި ރާއްޖެއިން ބައެއް ގެއްލިއްޖެއޭ ކިޔައި ދައްކާ ވާހަކަ ހުއްޓުވަންޖެހޭ."
ނިހާދު އިތުރަށް ވިދާޅުވީ، އިސްލާމް ދީން ނޫން އެހެން ދީނަކަށް ފުރުސަތެއް ނެތް ކަމަށެވެ.
ރާއްޖެ އާއި މޮރިޝަސްގެ ކަނޑުގެ ސަރަހައްދުން ފުށުއަރަނީ 95،000 އަކަކިލޯމީޓަރުގެ ސަރަޙައްދެކެވެ. ދެ ޤައުމުން ޚިޔާލު ތަފާތުވި ބައި އިޓްލޮސް އިން ބެހި ގޮތުން ރާއްޖެއަށް މުޅި ޖުމްލަ 47،232 އަކަކިލޯމީޓަރު ލިބެއެވެ. މޮރިޝަސް އަށް ލިބެނީ 45،331 އަކަކިލޯ މީޓަރެވެ.
އިޓްލޮސްގެ މި ނިންމުމުގެ ސަބަބުން ރާއްޖޭގެ ކަނޑުން ބައެއް މޮރިޝަސް އަށް ގޮސްފައިވާ ކަމަށް ސަރުކާރާއި ދެކޮޅު ފަރާތްތަކުން އަންނަނީ ބުނަމުންނެވެ.
