އިންޑިއާގެ ރެއިލް އެކްސިޑެންޓާ ގުޅިގެން ރައީީސްގެ ތައުޒިޔާ
އިންޑިއާގައި ހިނގި ނުރައްކާތެރި ރޭލު އެކްސިޑެންޓުގައި އެތައް ބަޔަކު މަރުވުމާއި ގުޅިގެން، އެ ޤައުމުގެ ބޮޑުވަޒީރު ނަރެންދުރަ މޯދީއަށާއި އެ ހާދިސާގައި މަރުވި މީހުންގެ އާއިލާތަކަށް ރައީސް އިބްރާހީމް މުޙައްމަދު ޞާލިޙު ތައުޒިޔާ ފޮނުއްވައިފިއެވެ.
ރައީސް ޞާލިޙު ކުރެއްވި ޓުވީޓެއްގައި ވިދާޅުވެފައިވަނީ، މި ހާދިސާގައި މަރުވި މީހުންގެ އެންމެހާ އާއިލާތަކަށް ތައުޒިޔާ ފޮނުއްވާ ކަމަށާއި، ހެޔޮ ދުޢާ އިންޑިއާ ސަރުކާރާ އަދި އެ ޤައުމުގެ ރައްޔިތުންނާ އެކު ކަމަށެވެ.
އިންޑިއާގެ ތާރިޚުގައި ވެސް، އެ ޤައުމުގައި ހިނގި އެންމެ ނުރައްކާތެރި ރެއިލް އެކްސިޑެންޓް، ހުކުރު ދުވަހު އޮޑީޝާ ސްޓޭޓްގައި ހިނގާފައިވާއިރު، މި ހިތާމަވެރި ހާދިސާގައި 288 މީހުން މަރުވެފައިވާ ކަމަށް ރިޕޯޓްތައް ބުނެއެވެ. އަދި ހާހަކަށްވުރެ ގިނަ މީހުން ޒަޚަމް ވެސް ވިއެވެ.
މި އެކްސިޑެންޓާ ގުޅިގެން ރެސްކިއު ޓީމުތަކުން ވަނީ، މީހުން ސަލާމަތް ކުރަން ބޮޑު އޮޕަރޭޝަނެއް ފަށައިފައެވެ.
