ކޮވިޑުގެ ފަރުވާއަށް ތަކެތި ފޯރުކޮށް ދިނުމަށް ވަރަށް ކުޑަ އަގެއް ހުށަހެޅިން: އޭޑީކޭ
ރާއްޖޭގައި ހަލުވި ކަމާއެކު ފެތުރެމުން އަންނަ ނުރައްކާތެރި ކޮވިޑުގެ ފަރުވާ ދިނުމަށް ބޭނުންވާނެ މެޑިކަލް ސާމާނު ހޯދުމަށްޓަކައި، ސަރުކާރުގެ ކަމާއިބެހޭ މުއްސަސާތަކަށް ވަރަށްކުޑަ އަގެއް ހުށަހެޅިކަމަށް ރާއްޖޭއަށް މެޑިކަލް ސާމާނު އެތެރެ ކުރާ އޭޑީކޭ ޓުރޭޑުން ބުނެފިއެވެ.
ސީއެންއެމްއަށް ދެއްވި ޚާއްސަ އިންޓަރވިއު އެއްގައި އޭޑީކޭ ޓުރޭޑުގެ އެކްޒެކެޓިވް ޑިރެކްޓަރު މުޙައްމަދު ފަރުދީން ވިދާޅުވެފައިވަނީ ކޮވިޑުގެ ނުރައްކަލުން ދިވެހި ރާއްޖެ ސަލާމަތް ކުރުމަށްޓަކައި ރާއްޖެއަށް ބޭނުންވާނޭ ސިއްޙީ ސާމާނުތައް ފޯރު ކޮށްދިނުމަށް ހެލްތު މިނިސްޓްރީއަށާއި، އެސްޓީއޯ އަށާއި، ރައީސް އޮފީހަށްވެސް ކޯޓޭޝަން ފޮނުވި ކަމަށެވެ. އަދި ކޮވިޑުގެ ފަރުވާއަށް ހޭދަކޮށްފައިވާ ތަކެއްޗަށް ބޮޑެތި ހޭދަ ތަކެއް ކޮށްފައިވާ ޚަރަދުތަކުގެ އޮޑިޓެއް ހެދުމަށްފަހު އެ އޮޑިޓު ރިޕޯޓުތަކުން ވަނީ ހާމަކޮށްފައެވެ.
ދުނިޔޭގެ މަޝްހޫރު ބްރޭންޑެއް ކަމަށްވާ ޑްރެގާގެ ވެންޓިލޭޓަރެއް 2500 ޑޮލަރަށް ( ގާތްގަނޑަކަށް 316110 ދިވެހި ރުފިޔާ ) ފޯރުކޮށްދިނުމަށް ހުށަހަޅާފައިވާ ކަމަށާއި، އެހެން ނަމަވެސް ހެލްތު މިނިސްޓުރީގެ އެއްވެސް ޚަބަރެއް އޭގެ ފަހުން ވެފައި ނުވާ ކަމަށްވެސް މުޙައްމަދު ފަރުދީން ވަނީ ވިދާޅުވެފައެވެ.
ވެންޓިލޭޓަރުގެ ކޯޓޭޝަން އެއް ހެލްތު މިނިސްޓުރީން ގެންދިޔަ ފަހުން، އެސްޓީއޯ އިންވެސް އަދި ރައީސް އޮފީހުން ވެސް ބޭފުޅަކު ގުޅުއްވައިގެން ކޯޓޭޝަން ނެގި ކަމަށް ވެސް މުޙައްމަދު ފަރުދީން ވަނީ ވިދާޅުވެފައެވެ. އަދި އެހިސާބުން އެއްވެސް އިތުރު ޚަބަރެއް ވެފައި ނުވާ ކަމަށާއި، އެންމެ ފަހުން ނެރުނު އޮޑިޓު ރިޕޯޓުގައި ވެންޓިލޭޓަރަކަށް 32000 ޑޮލަރު ޚަރަދު ކޮށްފައި ވާ ކަމަށްވެސް ސީއެންއެމް އަށް، މުހައްމަދު ފަރުފީން ވަނީ ވިދާޅުވެފައެވެ.
އޭނާ ވިދާޅުވީ ދެވަނަ ކަމަކަށް ކޮވިޑަށް ހަދާ ޓެސްޓު ހެދުމަށްޓަކައި ބޭނުންވާ ޕީސީއާރު ޓެސްޓު ކިޓް ގެނައުމަށް ސަރުކާރުން ރަނގަޅު ހުށަހެޅުންތަކެއް ހުށަހެޅި ކަމަށާއި، އޭރުވާހަކަ ދެކެވުނު ފަރާތްތަކުގެ އަގަށް ވުރެ 40 އިންސައްތަ އަގު ހެޔޮކޮށް ރޯޗު ބުރޭންޑުގެ ޕީސީއާރު ޓެސްޓު ކިޓު ފޯރު ކޮށްދެވިދާނެ ވާހަކަ ދެންނެވި ކަމަށެވެ.
އޭނާ ވިދާޅުވީ ރާއްޖެއަށް ބޭނުންވާ ސިއްހީ ސާމާނުތައް ފޯރުކޮށްދިނުމުގައި ބޮޑު ފައިދާއެއް ހޯދުމުގެ ވިސްނުން ކުންފުނީގެ ޗެއަރމަން އަހުމަދު ނަޝީދު ( އޭޑީކޭ ނަޝީދު ) ނުގެންގުޅުއްވާ ކަމަށާއި، ވީހާވެސްކުޑަކޮށް މިސާމާނު ގެނައުމަށް ޗެއަރމަން އިރުޝާދު ދެއްވައި ކަމަށް ވިދާޅުވިއެވެ. އަދި މިހެން ކަންތައް ކުރައްވަނީ ކޮވިޑާ ގުޅިގެން ކަމަށް ވެސް އޭނާ ވިދާޅުވިއެވެ.
ކޮވިޑު ޓެސްޓު ހެދުމަށް ޓަކައި މާފަރު އެއަރޕޯޓުގައި ސޮނިވާގެ ޚަރަދުގައި ލެބެއް ހަދައި އަދި އެތަން ބަލަހައްޓަނީ އޭޑީކޭ އިން ކަމަށާއި، އެމަސައްކަތް އޭޑީކޭ އާއި ހަވާލު ކުރިތާ އެއްމަސް ދުވަހުގެ ތެރޭގައި ސޮނިވާގައި ކޮވިޑް ޓެސްޓު ހަދަން ފެށި ކަމަށް އޭނާ ބުންޏެވެ.
