ބަނދަރުގެ މައްސަލަ ހައްލު ނުވެ މުދަލަށް ގެއްލުންވާތީ ދިއްދޫ ރައްޔިތުން އިހުތިޖާޖަށް
އދ. ދިއްދޫ ބަނދަރުގެ މައްސަލަ ހައްލު ނުކުރެވި ލަސްވަމުން ގޮސް، އޭގެ ސަބަބުން މުދަލަށް ގެއްލުން ވަމުންދާތީ އެރަށު ރައްޔިތުން ކައުންސިލް އިދާރާއަށް ވަދެ އިހުތިޖާޖު ކޮށްފި އެވެ.
ދިއްދޫ ބަނދަރު ތަރައްގީ ކުރަން އެރަށުގެ ނެރު ކެނޑީ 2021 ވަނަ އަހަރެވެ. އެހެންނަމަވެސް އޭރު ނެރު ކެނޑީ ނުބައި ދިމާލަކުން ކަމަށް ރައްޔިތުން ދެކެ އެވެ. މީގެ ސަބަބުން އެސަރަހައްދުގައި އަޅާފައިވާ އޮޑިދޯނި ފަހަރަށް ދަނީ ގެއްލުން ލިބެމުންނެވެ.
މިދިޔަ ބުރާސްފަތި ދުވަހު ރައްޔިތުން އިހުތިޖާޖަށް ނިކުތީ އެދުވަހު ވެހުނު ވާރޭގައި ބަނދަރުގައި އަޅާފައި އޮތް ލޯންޗެއް ބަންޑުން ޖަހާލައި އެހެން ލޯންޗެއް ބަނދަރުގައި ޖެހި ޖެހި ފަޅައިގެން ދިޔުމުންނެވެ. ނުބައި ދިމާލުން ނެރު ކަނޑާފައި އޮތުމުން ކަނޑު ގަދަވާއިރު ބަނދަރު ތެރޭގައި ބޮޑެތި ރާޅު ނަގައި އޮއި ގަދަވެ އެވެ.
ދިއްދޫ ކައުންސިލުން ބުނީ ނެރުގެ މައްސަލަ ހައްލުކޮށްދޭން އެދި ސަރުކާރުގެ އިދާރާތަކަށް ތަކުރާރުކޮށް ދަންނަވާފައިވާނެ ކަމަށެވެ. އެހެންނަމަވެސް އެއްެސް އިދާރާއަކުން އެކަމަށް ހައްލެއް ހޯދައިދޭން އިޖާބަ ދީފައިނުވާކަމަށް ކައުންސިލުން ބުންޏެވެ.
މިހަފްތާގެ ތެރޭގައި ދިއްދޫ ބަނދަރުގެ މައްސަލަ ހައްލު ކުރަން ބަޔަކާއި ހަވާލު ކުރާނެކަމަށް މީގެ ކުރިން ސަރުކާރުން ބުންޏެވެ.
ކަނޑު ގަދަވެ ދިޔަވަރު ބޮޑުވާ ވަގުތުތަކުގައި އެރަށު ބަނދަރަށް ރާޅު އަރައި ފެންބޮޑުވެ އެވެ. އަދި މީގެ ސަބަބުން އޮޑި ދޯނި ފަހަރުގެ ތެރެއަށް ފެން އެޅި އަޑިއަށް ދިޔުންފަދަ ކަންކަން މީގެ ކުރިންވެސް ވަނީ ކުރިމަތިވެފަ އެވެ.
