އިންޑިއާ-ޔޫއޭއީ މުހިންމު އެއްބަސްވުމަކަށް
އިންޑިއާ އާއި ޔޫއޭއީ އާ ދެމެދު ކުރާ ވިޔަފާރީގެ މުއާމަލާތްތަކުގައި ދެގައުމުގެ ފައިސާ ބޭނުންކުރަން އެއްބަސްވެއްޖެއެވެ.
ހޮނިހިރު ދުވަހު، ރިޒާވް ބޭންކް އޮފް އިންޑިއާ އާއި ސެންޓްރަލް ބޭންކް އޮފް ޔޫއޭއީ އިން ވަނީ ދެ އެއްބަސްވުމެއްގައި ސޮއިކޮށްފައެވެ. އެއީ ބޯޑަރު ހުރަސްކޮށް ދެގައުމުން ކުރާ މުއާމަލާތްތަކުގައި ލޯކަލް ފައިސާ ބޭނުންކުރުމަށާއި ދެގައުމުގެ ޕޭމަންޓް އަދި މެސެޖިން ސިސްޓަމްތައް ގުޅައިލުމަށެވެ.
މިދެ އެއްބަސްވުމުގައި ސޮއިކުރެވިގެން ދިޔައީ އިންޑިއާގެ ބޮޑުވަޒީރު ނަރެންދުރަ މޯދީ ދާދިފަހުން ޔޫއޭއީ އަށް ކުރެއްވި ދަތުރު ފުޅުގައި މޯދީ އާއި ޔޫއޭއީގެ ރައީސް މުހައްމަދު ބިން ޒައިދު އަލް ނަހްޔާންގެ ހާޒިރުގައި، އަބޫ ދާބީގައެވެ.
މި އެއްބަސްވުންތަކުގެ ދަށުން، އިންޑިއާ ރުޕީސް އާއި ދިރުހަމް ބޭނުންކުރުން އިތުރުކުރުމަށް ލޯކަލް ކަރަންސީ ސެޓްލްމަންޓް ސިސްޓަމް (އެލްސީއެސްއެސް) އެއް ގާއިމް ކުރާނެ އެވެ. އަދި ކަރަންޓް އެކައުންޓް މުއާމަލާތްތަކާއި ހުއްދަ ލިބިފައިވާ ކެޕިޓަލް އެކައުންޓް މުއާމަލާތްތައްވެސް ހިމެނެއެވެ.
އިންޑިއާ އާއި ޔޫއޭއީން ވަނީ އަބޫދާބީގައި އިންޑިއަން އިންސްޓިޓިއުޓް އޮފް ޓެކްނޮލޮޖީ (އައިއައިޓީ)-ދިއްލީގެ ކެމްޕަހެއް ގާއިމްކުރުމަށްވެސް އެއްބަސްވުމެއްގައި ސޮއިކޮށްފައެވެ.
