އަފްޣާނިސްތާނުން ދަނީ ހަނގުރާމަވެރިންނަށް ހިމާޔަތްދެމުން: ޕާކިސްތާން
އަފްޣާނިސްތާނުގައި ވެރިކަންކުރާ ޠާލިބާނުން ހަނގުރާމަވެރިންނާއި ޓެރެރިސްޓުންނަށް ހިމާޔަތްދެމުންދާ ކަމަށް ތުހުމަތުކޮށް، އެ ކަމާ މެދު ފިޔަވަޅު އަޅާނެ ކަމުގެ އިންޒާރު ޕާކިސްތާނުގެ އަސްކަރިއްޔާއިން ދީފިއެވެ. ޕާކިސްތާނުގެ އަސްކަރިއްޔާއިން މި ފަދަ އިންޒާރެއް ދީފައި މި ވަނީ ހަނގުރާމަވެރިންގެ ހަމަލަތަކެއްގައި ޕާކިސްތާނުގެ އަސްކަރިއްޔާގެ 12 ސިފައިން މަރައިލުމާ ގުޅިގެންނެވެ.
ޕާކިސްތާނުގައި ހަރަކާތްތެރިވާ ހަނގުރާމަވެރި ޖަމާޢަތަކުން ދާދި ފަހުން ވަނީ އެ ޤައުމުގެ ދެކުނުގައި އޮންނަ ބަލޮޗިސްތާނުގައި ހުންނަ އަސްކަރީ މަރުކަޒަކަށް ހަމަލަދީ ސިފައިންގެ ނުވަ މީހުން މަރައިލާފައެވެ. ބަލޮޗިސްތާނަކީ އަފްޣާނިސްތާނާއި އީރާންގެ ސަރަޙައްދީ ރޮނގު ކައިރީގައި އޮންނަ ސަރަޙައްދެކެވެ. އަދި، ޖުލައި 12 ވަނަ ދުވަހު ދިން އެހެން ހަމަލައެއްގައި ސިފައިންގެ އިތުރު ތިން މީހުން މަރައިލާފައެވެ.
ޕާކިސްތާނުގެ އަސްކަރިއްޔާއިން ބުނީ އެ ހަމަލަތަކުގެ ފަހަތުގައި އޮތީ އެ ޤައުމުގައި ހަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ތަހްރީކް އަލް-ޠާލިބާން ޕާކިސްތާން (ޓީ.ޓީ.ޕީ) ކަމުގައެވެ. އަދި، އަފްޣާނިސްތާނުގައި ވެރިކަން ކުރާ ޠާލިބާނުން ޓީ.ޓީ.ޕީގެ ހަނގުރާމަވެރިންނަށް އެ ޤައުމުގައި ހިމާޔަތް ދެމުންދާ ކަމުގައެވެ.
"ޓީ.ޓީ.ޕީން ޕާކިސްތާނުގެ އަސްކަރިއްޔާއާ ދެކޮޅަށް ހިންގާ ހަރަކާތްތައް ހުއްޓުވާނަން. އަދި، އެ ޖަމާޢަތުން ހިންގާ ޓެރެރިޒަމްގެ އަމަލުތަކުގައި އަފްޣާނިސްތާނުގެ ރައްޔިތުންގެ ބައިވެރިވުން އޮތުމަކީ ކަންބޮޑުވާ މައްސަލައެއް. އެ ކަން ބަލައެއް ނުގަނެވޭނެ،" ޕާކިސްތާނުގެ އަސްކަރިއްޔާއިން ނެރުނު ބަޔާނެއްގައި ބުންޏެވެ.
މި ތުހުމަތުތަކަށް ރައްދު ދޭން ޠާލިބާނުންގެ ޚާރިޖީ ވުޒާރާއިން ވަނީ ދެކޮޅު ހަދާފައެވެ. ނަމަވެސް، ޕާކިސްތާނުގައި ޓެރެރިސްޓު ޖަމާޢަތްތަކުން ހިންގާ އަމަލުތަކުގައި އަފްޣާނިސްތާނުގެ އެއްވެސް ބައިވެރިވުމެއް ނޯންނާނެ ކަމުގައި ޠާލިބާނުން މީގެ ކުރިން ބުނެފައިވެއެވެ. އަދި، އެ ފަދަ ހަރަކާތްތައް ހިންގަން އަފްޣާނިސްތާން ބޭނުން ކުރުމުގެ އެއްވެސް ފުރުޞަތެއް ނޯންނާނެ ކަމުގައި ވެސް ކާބުލްއިން ވަނީ ބުނެފައެވެ.
ބަލޮޗިސްތާނަކީ މައުދަނީ ގޮތުން މުއްސަނދި ސަރަޙައްދެކެވެ. ޕާކިސްތާނުގެ އިންތިޚާބީ ސަރުކާރު ވައްޓައިލާ އަމިއްލަ ވެރިކަމެއް ގާއިމުކުރަން ބަލޮޗިސްތާނުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން ބޭނުންވެއެވެ. އަދި، އެ ކަން ކުރުމަށް ދަނީ މަސައްކަތް ކުރަމުންނެވެ.
ޕާކިސްތާން ސަރުކާރާއި ބަލޮޗިސްތާނުގައި ހަރަކާތްތެރިވާ ހަތިޔާރުއެޅި ޖަމާޢަތްތަކާ ދެމެދު ސުލްޙައިގެ އެއްބަސްވުމެއް އެކުލަވައިލާފައިވީ ނަމަވެސް، ހަތިޔާރުއެޅި ޖަމާޢަތްތަކުން ވަނީ އެ އެއްބަސްވުމަށް އަމަލުކުރުން ހުއްޓައިލާފައެވެ. އަދި، އެއަށްފަހު ޕާކިސްތާނުގެ ސަރުކާރާއި އަސްކަރިއްޔާގެ އަމާޒުތަކަށް ޓެރެރިސްޓު ހަމަލަތައް ދޭން ފަށާފައެވެ.
ޕާކިސްތާނުގެ ހުޅަނގުއުތުރުގައި އޮންނަ ޕިޝާވަރުގައި ހުންނަ ފުލުހުންގެ މަރުކަޒަކަށް މި އަހަރުގެ ކުރީކޮޅު ދިން ނުރައްކާތެރި ބޮމުގެ ހަމަލައެއްގައި ފުލުހުންގެ 100 އެއްހާ މީހުން މަރައިލާފައިވާ ކަން ފާހަގަކުރެވެއެވެ. އެ ހަމަލާގެ ފަހަތުގައި އޮތީ ޓީ.ޓީ.ޕީން ކަމަށް ޕާކިސްތާނުން ގަބޫލުކުރެއެވެ.
Ads by STO
