އޮންލައިންކޮށް، ރީ-ރަޖިސްޓަރ ވެވޭނެ މުއްދަތު އިތުރު ކޮށްފި
އަންނަ ސެޕްޓެމްބަރު މަހުގެ ނުވަ ވަނަ ދުވަހުގައި ބާއްވާ ރިޔާސީ އިންތިޚާބުގައި، އޮންލައިންކޮށް ރީ-ރަޖިސްޓަރ ކުރުމަށް ހުޅުވައިލި މުއްދަތު އަންނަ ބުދަ ދުވަހާ ހަމައަށް އިތުރުކޮށްފިއެވެ.
އޮންލައިންކޮށް ރީރަޖިސްޓާ ކުރަން ކުރިން ހުޅުވައިލި މުއްދަތު މިރޭ 12:00 ޖަހާއިރުގެ ނިޔަލަށް ހަމަވާ ގޮތަށް އޮތްއިރު، މިއަދު އިލެކްޝަންސް ކޮމިޝަން (އީސީ) އިން ކުރެއްވި އިޢުލާނެއްގައި ވިދާޅުވީ، މިހާރު އެ މުއްދަތު އޮގަސްޓް މަހުގެ ދެއެއް ވާ ބުދަ ދުވަހުގެ ނިޔަލަށް އިތުރުކޮށްދީފައިވާ ކަމަށެވެ.
އޮންލައިންކޮށް ފުރަތަމަ ފަހަރަށް ރީރަޖިސްޓާކުރާ ގޮތަށް ހަމަޖެހި އެ ފުރުސަތު ބުދަ ދުވަހާ ހަމައަށް އޮތް ނަމަވެސް، ހާޒިރުވެ، ފޯމު ހުށަހަޅައިގެން ރީ-ރަޖިސްޓާވުމުގެ މުއްދަތު ހަމަވަނީ އަންނަ ހޮނިހިރު ދުވަހަށެވެ.
އެންމެ ފަހުން ބޭއްވި ކައުންސިލް އިންތިހާބުގައި މާލޭގައި ވޯޓުލާން ރަޖިސްޓްރީވި މީހުން ރިޔާސީ އިންތިޚާބުގައި ވެސް ވޯޓުލާ ގޮތަށް ރަޖިސްޓްރީ ވެފައިވާނީ މާލެއަށެވެ.
އެހެންކަމުން މި ފަހަރު މާލޭގައި ވޯޓުލާން ބޭނުންވާ އެހެން ރަށްރަށުގެ ރަށްވެހީން ރީރަޖިސްޓާކުރާކަށް ނުޖެހޭނެއެވެ.
