ޕާކިސްތާނުގައި ދިން ބޮމުގެ ހަމަލާއާ ގުޅިގެން ހީވީ "ގިޔާމަތް ވެގެން އުޅޭހެން"
ޕާކިސްތާންގެ ޚައިބަރު ޕަޚްތުންޚުވާގެ ބަޖައުރު ޑިސްޓްރިކްޓްގައި އާދީއްތަ ދުވަހު ދިން ބޮމުގެ ހަމަލާއާ ގުޅިގެން ހީވީ ގިޔާމަތް ލައިގަނެގެން އުޅޭހެން ކަމަށް، މަންޒަރު ދުށް ބައެއް މީހުން ބުނެފިއެވެ. ހަމަލާއާ ގުޅިގެން މީހުންތައް އެހީއަށް އެދި ހަޅޭއްލަވައި ރޮއި ހެދިއިރު، އެހީތެރިވާން ނިކުތް ފަރާތްތަކުން ވަނީ ގިނަ ބަޔަކު ސަލާމަތް ކޮށްގެން ނެރެ ފަރުވާއާ ހަމައަށް ގެންދެވޭތޯ މަސައްކަތް ކޮށްފައެވެ. މިހަމަލާގައި މަރުވި މީހުންގެ އަދަދު މިހާރު ވަނީ 45ށް އަރާފައެވެ.
މީހަކު އަމިއްލަ ގައިގައި ބޮން ހަރުކޮށްގެން ދިން މި ހަމަލާއަކީ އިސްލާމިސްޓް ޕާޓީއެއް ކަމަށްވާ ޖާމިއަތު އުލަމާ އެ އިސްލާމް (ޖޭޔޫއައި)ގެ އިސް ބައެއް ފަރާތްތަކަށް އަމާޒުކޮށްގެން ދީފައިވާ ހަމަލާއެކެވެ. ޖޭޔޫއައި ޕާޓީގެ ރީޖަނަލް ލީޑަރެއް ކަމަށްވާ މައުލާނާ ޒިއާއުﷲ އާއި އެހެން ބައެއް އިސް މެމްބަރުން ވަނީ މި ހަމަލާގައި އަވާހަވެފައެވެ.
ޖޭޔޫ އައި ޕާޓީއަކީ ސަރުކާރުގެ ކޯލިޝަނުގައި ހިމެނޭ ޕާޓީއަކަށް ވާއިރު، އާދީއްތަ ދުވަހުގެ އެއްވުމަކީ މިއަހަރު ފަހުކޮޅު އޮންނަ އިންތިޚާބަށް ކެމްޕެއިންކުރުމަށް ބޭއްވި އެއްވުމެކެވެ.
އެއްވުން ކުރިޔަށް ދިޔައިރު ސްޓޭޖް މަތީގައި އިންމީހަކު ކިޔައިދިންގޮތުގައި ބާރު އަޑުފަށްގަނޑަކާއެކު ބޮން ގޮވުމާއެކު ހުޅު ފަޅައިގެން ދިޔައެވެ. އަދި ބޮމުއެތެރޭގައި ހިމެނޭ ކަމަށް ބެލެވޭ ކުދި ދަގަނޑު އެތިކޮޅުތައް މީހުން ގަނޑުގެ ތެރެޔަށް ބުރައިގެން ދިޔައެވެ. އެވަގުތު އެންމެން ހަޅެއްލަވައި އެކި ކޮޅުކޮޅު މައްޗަށް ދުއްވައިގެންފައި ވާއިރު، މީހުންތައް މަރުވެގެން ނުވަތަ އަނިޔާވެގެން ވެއްޓެމުން ދާތަން ފެނުނު ކަމަށް އޭނާ ކިޔަޢިދީފައިވެއެވެ.
އަފްޣާނިސްތާނުގެ ބޯޑަރާ ކައިރި ހިސާބެއްކަމަށްވާ ބަޖައުރުގައި ދިންމިހަމަލާ ބޮޑުވަޒީރު ޝަހުބާޒު ޝަރީފް ވަނީ ކުށްވެރިކުރައްވާފައެވެ. އަދި މިއީ އިސްލާމް ދީނަށާއި ކީރިތި ގުރުއާނަށް، އަދި ޕާކިސްތާނުގެ ގައުމިއްޔަތަށް އަމާޒުކޮށް ޓެރަރިސްޓުން ދީފައިވާ ހަމަލާއެއްކަމަށާއި، މިކަން ކުރި ފަރާތްތައް ހޯދައި އަދަބު ދެވޭނެ ކަމަށް ޝަހުބާޒު ޝަރީފް ވިދާޅުވެފައި ވެއެވެ.
ބޮމުގެ ހަމަލާ ދިންކަމުގެ ޒިންމާ އަދި އެއްވެސް ފަރާތަކުން އުފުލާފައެއް ނުވެއެވެ. ނަމަވެސް ބަޖައުރު ޑިސްޓްރިކްޓުގައި މީގެ ކުރިން ދެވުނު މިފަދަ ހަމަލާތަކުގެ ޒިންމާ އައިއެސް ޖަމާއަތުގެ ޕާކިސްތާނު ގޮފިން އުފުލާފައި އެބަހުއްޓެވެ.
މިހަމަލާގައި ތާލިބާނުންގެ އެއްވެސް ބައިވެރިވުމެއް ނުވާކަމަށް އެފަރާތުން ބުނެފައި ވެއެވެ.
އަވައްޓެރި އަފްޣާނިސްތާނުގެ ވެރިކަމަށް ހަރުކަށި ފިކުރުގެ ތާލިބާން ޖަމާއަތުން 2021 ވަނަ އަހަރު އަލުން އައިފަހުން، އެޖަމާއަތުން ދޭކަމަށް ބެލެވޭ ހަމަލާތައްވެސް ވަނީ އަފްޣާނިސްތާނުގެ އިމާ ކައިރިން ޕާކިސްތާނުގެ ހުޅަނގު އުތުރު ސަރަހައްދުގައި އިތުރުވެގެން ގޮސްފައެވެ.
ތާލިބާން ޖަމާއަތުން ކުރިން ތިބީ މިފަދަ ހަމަލާތައް ހުއްޓާލުމުގެ އެއްބަސް ވުމެއްގައި ސޮއިކޮށްގެންނެވެ. ނަމަވެސް މިދިޔަ އަހަރުގެ ނޮވެމްބަރު މަހު ވަނީ އެއްބަސްވުން ނިމުމަކަށް އައިސްފައެވެ.
