އަަހަރެން އެއްވެސް ދީނެއް ޤަބޫލެއް ނުކުރަން!: އަކްޝޭ
ބޮލީވުޑްގެ ސުޕަރސްޓާ އަކްޝޭ ކުމާރު އެއްވެސް ދީނެއް ޤަބޫލު ނުކުރާ ކަމަށާއި އޭނާ ހަމައެކަނި ޤަބޫލު ކުރަނީ އިންޑިއާ ރައްޔިތަކަށްވުން ކަމަށް، އަކްޝޭ ބުނެފިއެވެ.
އަކްޝޭ ބުނީ އޭނާ އެއްވެސް ދީނަކަށް ޤަބޫލު ނުކުރާ ކަމަށާއި އޭނާ ޤަބޫލު ކުރަނީ "އިންޑިއަން" އަކަށްވުމަށް ކަމަށެވެ. އަދި އޭނާގެ އެންމެ ފަހުގެ ފިލްމު "ސޫރްޔަވަންޝީ" އިން ވެސް ދައްކުވައިދޭނީ އެކަން ކަމަށް އޭނާ ބުނެފައިވެއެވެ.
"ސޫރްޔަވަންޝީ" އަކީ "ގޯލްމާލް"، "ސިންގަމް" އަދި "ސިމްބާ" ފަދަ ސުޕާހިޓް ފިލްމުތައް އުފައްދާފައިވާ ރޯހިތު ޝެޓީގެ އުފެއްދުމެކެވެ.
2011 ވަނަ އަހަރު ރިލީޒްވި "ސިންގަމް" ފަދައިން "ސޫރްޔަވަންޝީ" އަކީ ވެސް ފުލުހެއްގެ ދިރިއުޅުން ދައްކުވައިދޭ ފިލްމެއް ކަމަށް ރިޕޯޓުތަކުން ބުނެއެވެ.
"ސޫރްޔަވަންޝީ އަކީ ވަކި ދީނެއް އިސްކޮށްގެން ހަދާފައިވާ ފިލްމެއް ނޫން" ރޯހިތު ބުނެފައިވެއެވެ.
މީގެއިތުރުން މިހާރު އިންޑިއާގައި ހިންދޫންނާއި މުސްލިމުންނާއި ދެމެދު އުފެދިފައިވާ ހަމަނުޖެހުމުގެ މަންޒަރު ފިލްމުން ފެންނާނެތޯ ސުވާލު ކުރުމުން ރޯހިތު ބުނީ އެފަދަ މަންޒަރުތައް ވެސް ފެންނާނެ ކަމަށާއި ނަމަވެސް އެއީ އިއްތިފާގަކުން ފިލްމުގައި ހިމެނުނު މަންޒަރުތަކެއް ކަމަށެވެ.
Ads by STO
