2028 ވަނަ އަހަރު އަންނައިރު، ރާއްޖޭގެ އިޤްތިޞާދު 170 ބިލިއަން ރުފިޔާ ފަހަނައަޅައިދާނެ: ރައީސް
2028 ވަނަ އަހަރު އަންނައިރު، ރާއްޖޭގެ އިޤްތިޞާދު 170 ބިލިއަން ރުފިޔާ ފަހަނައަޅައިދާނެ ކަމަށް ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސް މިހެން ވިދާޅުވީ، އެމަނިކުފާނުގެ "އުފާވެރި މެނިފެސްޓޯ" ލޯންޗު ކުރަން މިރޭ، ޒުވާނުންގެ މަރުކަޒުގައި ބޭއްވި ޖަލްސާގައެވެ.
އެމްޑީޕީގެ ރިޔާސީ ކެންޑިޑޭޓް، ރައީސް ޞާލިޙު ވިދާޅުވީ 10 އަހަރުގެ ތެރޭގައި ރާއްޖޭގެ އިޤްތިޞާދު ދެ ގުނަ ވެގެންދާތަން ފެނިގެންދާނެ ކަމަށެވެ.
ވެލާނާ އިންޓަރނޭޝަނަލް އެއާޕޯޓް(ވީއައިއޭ) އާއި ހަނިމާދޫ އާއި ގަން އިންޓަރނޭޝަނަލް އެއާޕޯޓާއި މާފަރު އިންޓަރނޭޝަނަލް އެއާޕޯޓު ވެސް ބޮޑު ކުރާނެ ކަމަށާއި، ވީއައިއޭ ތަރައްގީ ވުމުން ހަތް މިލިއަން ފަތުރުވެރިންނަށް ހިދުމަތް ދެވޭ ގޮތަށް، ހިދުމަތްތައް ފުޅާކުރެވިގެންދާނެ ކަމަށެވެ.
"އަމާޒަކީ 2028 ވަނަ އަހަރު އަންނައިރު، ރާއްޖެއަށް އަންނަ ޓޫރިސްޓުންގެ އަދަދު، ތިން މިލިއަން ހުރަސްކޮށް، ހަތަރު މިލިއަން، ފަސް މިލިއަނަށް ގެންދިޔުން. މިކަން ކުރުމަށްޓަކާ ޑޮމެސްޓިކް އެތައް އެއާޕޯޓެއް އަޅަމުން އެދަނީ." ރައީީސް ވިދާޅުވިއެވެ.
"މާލޭގެ ބަނދަރު ގުޅީފަޅަށް ބަދަލު ކުރެވޭނެ، އަދި އިތުރު އިޤްތިޞާދީ މަސައްކަތްތަކެއް ކުރެވެމުން އެދަނީ."
މި މަޝްރޫޢުތަކުގެ ސަބަބުން ލިބޭ އެންމެ ބޮޑު އުފަލަކީ ވަޒީފާތައް އިތުރުވުން ކަމަށް ރައީސް ޞާލިޙު ވަނީ ވިދާޅުވެފައެވެ. ރައީސް ވިދާޅުވީ އެއާޕޯޓްތައް ތަރައްޤީ ކުރުމާއިއެކު ޓޫރިސްޓް ބެޑް ތަރައްޤީ ކުރުމުގެ މަޝްރޫޢުތަކެއް ވެސް ހިނގަމުން އަންނަ ކަމަށެވެ.
"ހަމައެކަނި ސަރުކާރުން އިސްނަގައިގެން ހިންގާ މަޝްރޫޢުއަކުން އައްޑޫގައި ހަތްހާސް އެނދު އިތުރު ކުރެވިގެން އެދަނީ."
ރައީސް ޞާލިޙު ވަނީ މިފަދަ މަޝްރޫޢުއެއް އުތުރުގައި ވެސް ހިންގަވާނެ ކަމަށާއި، އެކަމުގެ ސަބަބުން ބޮޑުތިލަދުންމައްޗަށް ބޮޑު ބަދަލެއް އަންނާނެ ކަމަށެވެ.
