ތިނަދޫއަކީ ސިޓީއެއް ކަމަށް ކަނޑައަޅުއްވައިފި
ގދ. ތިނަދޫ އަކީ ސިޓީއެއް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް އިއުލާންކުރައްވައިފިއެވެ.
ރައީސް ޞާލިޙް މިކަން އިއުލާން ކުރައްވާފައިވަނީ މިރޭ އެރަށުގައި ޖަލްސާއެއްގެ ތެރެއިންނެވެ. ކެންޕެއިން ޖަލްސާގެ ތެރެއިން އެކަން މިއަދު ރައީސް ޞާލިޙް އިއުލާން ކުރެއްވިއިރު, ރައީސް ވިދާޅުވީ ތިނަދޫއަށް ސިޓީއެއްގެ ދަރަޖަ ދިނުމަށްޓަކައި އެމަނިކުފާނު ސޮއިކުރައްވަން ޖެހިވަޑައިގަންނަވާ ގަރާރުގައި މިއަދު ވާނީ ސޮއި ކުރައްވާފައިވާ ކަމަށެވެ.
ތިނަދޫއަށް ސިޓީއެއްގެ ދަރަޖަ ދިނުމަށް 2018 ވަނަ އަހަރުގެ ރިޔާސީ އިންތިހާބުގައި ވައުދުވެ ވަޑައިގެންނެވިއެވެ. ނަމަވެސް މިހާތަނަށް އެކަން ކުރައްވާފައެއް ނުވެއެވެ.
އިދިކޮޅު ރިޔާސީ ކެނޑިޑޭޓް, ޕީއެންސީގެ ޑރ. މުއިއްޒު ވެސް ވަނީ އެމަނިކުފާނުގެ ވެރިކަމެއްގައި ތިނަދޫ ސިޓީއެއްގެ ދަރަޖަ ދެއްވާނެ ކަމަށް ވައުދުވެ ވަޑައިގެންފައެވެ.
ރާއްޖޭގައި މިހާރު ސިޓީއެއްގެ ދަރަޖަ ދީފައިވަނީ ތިނަދޫގެ އިތުރުން ރާއްޖޭގެ ވެރިރަށް މާލެ، އައްޑޫ، ފުވައްމުލަކު އަދި ކުޅުދުއްފުށްޓަށެވެ.
