މަޝްރޫއުތައް ނުނިމި ހުންނަނީ ސަރުކާރުގެ ދޯދިޔާ ކަމުން: މުއިއްޒު
ކޮންމެ ރަށެއްގައި ވެސް، މިހާރުގެ ސަރުކާރުން ފަށާފައި ނުވަތަ ކޮށްދޭނަމޭ ބުނެ ނުނިމި ހުރި ބައިވަރު ކަންކަން އެބަހުރި ކަމަށާއި، މިހެން ވަނީ ސަރުކާރުގެ ދޯދިޔާ ސިޔާސަތުގެ ސަބަބުން ކަމަށް ޕީއެންސީގެ ރިޔާސީ ކެންޑިޑޭޓް، ޑރ.މުހައްމަދު މުއިއްޒު ވިދާޅުވެއްޖެއެވެ.
ރ.ރަސްގެތީމުގައި، ސަޕޯޓަރުންނާއި ބައްދަލުކުރައްވައި ވާހަކަ ދައްކަވަމުން މުއިއްޒު ވިދާޅުވީ، ކޮންމެ މަޝްރޫޢެއްވެސް ޢާއްމުކޮށް ހިންގާފައި ހުރި ގޮތަކީ، މަޝްރޫޢު ފަށަން ކުންފުންޏަކާ ހަވާލުކޮށްފައި %15 އެޑްވާންސް ދެނީ ކަމަށެވެ.
"ދުވަސްކޮޅަކުން އެ ކުންފުނި މަސައްކަތް ހުއްޓާލާފައި ފައިބައިގެން ދަނީ. ދެން އަނެއްކާ އަނެއް ކުންފުންޏަށް މަސައްކަތް ހަވާލުކޮށްފައި %15 ދެނީ. އެކުންފުނިވެސް ދުވަސްކޮޅަކުން ދަނީ. މިއީ ވަރަށް ބޮޑު އިހުމާލެއް." އެމަނިކުފާނު ވިދާޅުވިއެވެ.
އެމަނިކުފާނު ވިދާޅުވީ، މިކަމުގެ ސަބަބުން މަސައްކަތްތައް ނުނިމި އެތައް ފައިސާއެއް އިސްރާފުވެ ގެއްލިގެންދާ ކަމަށާއި، މިކަން މިހެން ވުމަށް އެމަނިކުފާނުގެ ސާ ސަރުކާރުން ދުލެއް ނުކުރައްވާނެ ކަމަށެވެ.
އަދި ރަސްގެތީމުގެ ބޭބީ ނާސަރީގެ ކަންކަންވެސް ރައްޔިތުން ފާހަގަކުރެއްވި ކަމަށާއި، ސަރުކާރުގެ ރަސްމީ ނިޒާމުގައި ޕްރީ ސްކޫލް ނުހިމަނައި އޮންނަކަމަށް ވިދާޅުވިއެވެ.
"އެކަމަށް ހެޔޮ ބަދަލެއް ގެންނަން އަޅުގަނޑުމެން މަޝްވަރާކުރަމުން މިދަނީ. މިހާރުވެސް އަޅުގަނޑު ދޭ ޔަގީންކަމަކީ، ބޭބީ ނާސަރީ އަދި ޕްރީސްކޫލް ހިންގަން ކޮންމެ ރަށަކަށްވެސް ސަރުކާރުން ބޮޑު އެހީތެރިކަމެއް ދޭނަން."
މުއިއްޒު ވިދާޅުވީ އެމަނިކުފާނުގެ އަމާޒަކީ ކޮންމެ ދުވަހަކު ވެސް 10 ވަރަކަށް ރަށަށް ދިއުން ކަމަށާއި، އިންތިޚާބު ކާމިޔާބުކޮށް އެ ރަށަށް ވަރަށް އަވަހަށް ދަތުރު ކުރައްވާނެ ކަމަށެވެ.
Ads by STO
