ކުޅުދުއްފުށި އެއާޕޯޓު، ފުރިހަމަ ތަނެއްގެ ގޮތުގައި ނިންމައިދޭނަން: މުއިއްޒު
ހދ.ކުޅުދުއްފުށީގައި، އިދިކޮޅު ލީޑަރު، ރައީސް ޔާމީން ތަރައްޤީކުރަން ފެއްޓެވި އެއާރޕޯޓް ކުރިއަކަށް ނުދާތީ، ޕީއެންސީގެ ރިޔާސީ ކެންޑިޑޭޓް، ޑރ.މުހައްމަދު މުއިއްޒު ކަންބޮޑުވުންފާޅުކުރައްވައިފިއެވެ.
ރިޔާސީ އިންތިޚާބުގެ ދެވަނަ ބުރުގެ ކެމްޕެއިނުގައި، ރޭ އެ ސިޓީގައި ވާހަކަ ދައްކަވަމުން މުއިއްޒު ވިދާޅުވީ، އެ ސިޓީގެ އެއާޕޯޓް، ބާރު ސްޕީޑުގައި ގެންގޮސް ފުރިހަމަ ތަނެއްގެ ގޮތުގައި އެތަން ތަރައްޤީކޮށް ނިންމައިދެއްވާނެ ކަމަށެވެ.
"އެއާރޕޯޓް ތަރައްޤީކުރާނީ ޕެސެންޖަރ ސާރވިސަސް އަށް ޚާއްސަ ސަމާލުކަމެއްދީގެން. އަދި އެއާރޕޯޓާއި ގުޅިފައި އޮތް ބިމަކީ ރައްޔިތުންނަށް އާމްދަނީ ލިބޭނެ ތަނަކަށް ހަދައިދޭނަން." އެމަނިކުފާނު ވިދާޅުވިއެވެ.
ޕީޕީއެމް-ޕީއެންސީގެ ސަރުކާރެއްގައި ކުޅިވަރަށް ބޮޑު ހޭދައެއް ކުރުމަށް ނިންމާފައިވާކަން ފާހަގަކުރައްވައި މުއިއްޒު އިތުރަށް ވިދާޅުވީ، ސިޓީ އެއްގައި ހުންނަންޖެހޭ ފެންވަރުގައި، ދެ ޖިންސަށް ބޭނުންވާ ކުޅިވަރު ވަސީލަތްތައް ހިމެނޭ ސްޕޯޓްސް ކޮމްޕްލެކްސް އެއް ކުޅުދުއްފުށީގައި ޤާއިމްކުރެވިގެންދާނެ ކަމަށެވެ.
އެމަނިކުފާނު ވިދާޅުވީ، ސަރުކާރުން ފަށާ މަޝްރޫޢުތައް ހުއްޓެނީ ރައްޔިތުންގެ ފައިސާ އިސްރާފުކުރާތީ ކަމަށާއި، އެއް ޕްރޮޖެކްޓެއް ނުނިންމާ ހަމަ އެޕްރޮޖެކްޓު ހަތަރު ފަސް ކުންފުންޏަކަށް ދޭ ކަމަށެވެ.
"އަޅުގަނޑުމެން ކުރިމަތިލައިގެން މިތިބީ ހިނގަހިނގާ ހުރި މަޝްރޫޢުތަކާއި ހުއްޓިފައިވާ މަޝްރޫޢުތަކާއި، ސޮއިކޮށްފައި ނުފަށައި އޮތް މަޝްރޫޢެއް ވިޔަސް ބާރު ސްޕީޑުގައި އެ މަސައްކަތްތައް ނިންމުމަށް."
ރައްޔިތުންގެ މަޝްރޫޢުތައް ކުރިއަށް ގެންދަން އާމްދަނީ ލިބުނަސް، ކަންކަން ނުނިމެނީ ކަންކަން ކުރާނެ ވައްޓަފާޅި ނެތުމުން ކަމަށާއި، އެމަނިކުފާނު އެކަން ގޮތަށް ވިޔަ ނުދެއްވާނެ ކަމަށް ވެސް ވިދާޅުވިއެވެ.
