އައްޑޫ ނޭޗަރ ޕާކުން އިޤްތިޞާދީ ނަފާ ލިބޭގޮތް ހެދުމަކީ މުޢިއްޒުގެ ވިސްނުމެއް
އައްޑޫ ނޭޗަރ ޕާކަކީ ރައްޔިތުންނަށް އިގްތިޞާދީ ނަފާ ލިބޭނެ ތަނަކަށް ހަދައިދިނުމަކީ އެމަނިކުފާނުގެ ވިސްނުމެއް ކަމަށް ޕީއެންސީގެ ރިޔާސީ ކެންޑިޑޭޓް، ޑރ.މުޙައްމަދު މުޢިއްޒު ވިދާޅުވެއްޖެއެވެ.
އައްޑޫ ސިޓީ ހިތަދޫ އުތުރު ޖަގަހައިގައި މިއަދު ސަޕޯޓަރުންނާއި ބައްދަލު ކުރައްވައި، މިކަން ހާމަކުރައްވަމުން މުޢިއްޒި ވިދާޅުވީ، އެއީ ފުދުންތެރި ރައްޔިތަކަށް ހެދުމަށް ޕީޕީއެމް/ޕީއެންސީގެ މެނިފެސްޓޯގައި ހިމަނައިގެން ކުރާ މަސައްކަތުގެ ތެރެއިން ކަމެއް ކަމުގައެވެ.
މުއިއްޒު އިތުރަށް ވިދާޅުވީ، ބަޔޯސްފިއާ ރިޒާރވް އަކީ ވަކި އުސޫލަކުން އިންޓަރނޭޝަނަލް މިންގަނޑުގެ ތެރެއިން އޮންނަ އެއްޗަކަށް ވުމުން، ބައެއް ބަދަލުތަކެއް ގެނައުމުގައި ކުރަންޖެހޭ މަޝްވަރާ ހުންނާނެ ކަމަށާއި، ބަޔޯސްފިއާ ރިޒާރވްގެ ތެރެއިން ހަދަންޖެހޭ މަގު ހެދުމުގެ މަސައްކަތް ހިތަދޫގެ މަގު މަޝްރޫޢުގެ ތެރެއިން ކޮށްދެވޭތޯ ބައްލަވާނެ ކަމަށެވެ.
"ޓުރިޒަމް އާއި ގެދޮރުވެރިކަމާއި، މަސްވެރިކަމާއި ރޭސިންގ ޓްރެކްގެ ވާހަކައާއި ހޮސްޕިޓަލް ތަރައްޤީ ކުރުމުގެ ވާހަކަ އަޅުގަނޑު ވާނީ ދަންނެވާފަ. އެގޮތަށް އެކަން ކޮށްދޭނެ ކަމުގެ ޔަގީންކަން ދެން." މުޢިއްޒު އިތުރަށް ވިދާޅުވިއެވެ.
އެމަނިކުފާނު އިތުރަށް ވިދާޅުވީ، ވެރިކަމަކީ ވަރަށް ބޮޑު ޒިންމާއެއް ކަމަށާއި، ރައްޔިތުން ހަވާލުކުރާ ވަރަށް ބޮޑު އަމާނާތެއް ކަމަށެވެ.
