ޓީޗިން ލައިސަންސަށް އެދުމުގެ ފުރުޞަތު މިއަދުން ފެށިގެން ހުޅުވައިލައިފި
ޓީޗިން ލައިސަންސަށް އެދުމުގެ ފުރުޞަތު އެޑިޔުކޭޝަން މިނިސްޓްރީން މިއަދުން ފެށިގެން ހުޅުވައިލައިފިއެވެ.
މިކަން ހާމަކުރައްވައި، މިނިސްޓްރީ އޮފް އެޑިޔުކޭޝަނުން މިއަދު ވަނީ "މުދައްރިސްކަމުގެ ލައިސަންސް" އަށް އެދޭނެ ގޮތް އިޢުލާނު ކުރައްވައިފައެވެ.
އެގޮތުން އެޑިޔުކޭޝަން މިނިސްޓްރީން ވިދާޅުވީ މުދައްރިސްކަމުގެ ލައިސަންސަށް އެދުމުގެ ފުރުސަތު ހުޅުވާލާފައި ވަނީ ވަންގަވް މެދުވެރިކޮށް ކަމަށެވެ.
މުދައްރިސްކަމުގެ ލައިސަންސަށް އެދުމުގެ ފުރުޞަތު އެކި އަތޮޅުތަކުގައި ޚިދުމަތް ދެއްވަމުންދާ މުދައްރިސުންނަށް ބަހާލާ، ތާވަލަކާއެއްގޮތަށް ކުރިއަށް ގެންދެވޭނެ އިންތިޒާމު އެ މިނިސްޓްރީން ވަނީ ހަމަޖައްސަވައިފައެވެ.
އެ މިނިސްޓްރީން އާންމުކުރެއްވި ތާވަލުގައިވާގޮތުން ހުކުރު ދުވަސް ފިޔަވައި ކޮންމެ ދުވަހަކުވެސް އެޕްލިކޭޝަން ހުށައެޅޭނެއެވެ.
މިގޮތުން ހއ. އަތޮޅުން ފެށިގެން އަންނަ ޑިސެމްބަރު މަހުގެ 9 ވަނަ ދުވަހާއި ހަމައަށް އަތޮޅުތަކުން ތާވަލާއި އެއްގޮތަށް ލައިސަންސަށް އެދެވޭނެ ކަމަށް އެ މިނިސްޓްރީގެ އިޢުލާނުގައި ވެއެވެ.
ހަމަ އެހެންމެ ޤުރުއާން ކްލާސްތަކާއި، ޓިއުޝަން ސެންޓަރުތަކާއި، މިނިސްޓްރީގައި ރަޖިސްޓަރީކޮށްގެން ހިންގާ އެހެނިހެން ތަންތަނުގައި މަސައްކަތްކުރާ މުދައްރިސުންނަށް ޑިސެމްބަރު މަހުގެ 6 އިން 9 އަކަށް މި ލައިސެންސަށް އެދި ހުށައެޅޭނެކަމަށް އެޑިޔުކޭޝަނުން ވިދާޅުވެއެވެ.
މީގެ އިތުރުން ޑިސެމްބަރު މަހުގެ 10 އިން ފެށިގެން ލައިސަންސް ބޭނުންވާ އެހެނިހެން ފަރާތްތަކަށް އެ ފުރުޞަތު އޮންނާނެ ކަމަށްވެސް އެ މިނިސްޓްރީން ހާމަކުރައްވައެވެ.
މުދައްރިސްކަމުގެ ލައިސަންސް ނެގުމަށް ހުށަހަޅާ ފޯމާއެކު ތަޢުލީމީ ސަނަދުތަކުގެ ޓްރާންސްކްރިޕްޓްތަކުގައި އެމްކިޔުއޭއިން ތައްގަނޑު ޖަހައި ސައްޙަކަން ކަށަވަރު ކުރުމަށާއި ޕޮލިސް ރިޕޯޓު ހޯދުމަށް އެ މިނިސްޓްރީން އެދިވަޑައިގެންފައިވެއެވެ.
