ހަށި ވިއްކި ދެ މީހަކަށް ހަތަރު މަހާއި 24 ދުވަހުގެ ޖަލު ހުކުމެއް
ހަށި ވިއްކި ދެ މީހަކަށް ހަތަރު މަހާއި 24 ދުވަހުގެ ޖަލު ހުކުމެއް ކްރިމިނަލް ކޯޓުން ކޮށްފިއެވެ.
މިދިޔަ ހޮނިހިރު ދުވަހު ކްރިމިނަލް ކޯޓުން ކުރި މި ހުކުމުގައި ހަށި ވިއްކިކަމުގެ ކުށުގައި މީގެ ހަތް އަހަރު ކުރިން ދައުލަތުން ދައުވާ ކުރި ދެ މީހެއްގެ މައްޗަށް ކުށް ސާބިތުވެ ހަތަރު މަހާއި 24 ދުވަހަށް ޖަލަށްލުމަށް ވަނީ ހުކުމްކޮށްފައެވެ.
ހަށި ވިއްކިކަމުގެ ކުށް ސާބިތުވެފައި ވަނީ އައްޑޫ ސިޓީ ހިތަދޫ އަންހެނަކާއި ނ. ވެލިދޫ އަންހެނެއްގެ މައްޗަށެވެ.
ޝަރީއަތުގެ މަޖިލީހުގައި މި ދެ މީހުން ވެސް ވަނީ އެ މީހުންގެ ކުށައް އިންކާރުކޮށްފަ އެވެ.
ނަމަވެސް މި ދެ މީހުންގެ މައްޗަށް ކުށް ސާބިތު ކޮށްފައި ވަނީ ތަހުގީގަށް ފުލުހުން ހޯދާފައިވާ ހެކި ހުށަހަޅައިގެންނެވެ.
މީގެ އިތުރުން މި މައްސަލައިގައި އެ ދެ މީހުންގެ މައްޗައް ކުށް ސާބިތުވާ ކަމަށް ނިންމީ ޝަރީއަތަށް ސާބިތުކުރެވޭ މިންވަރަށް ހެކި ލިބިފައިވާ ކަމަށް ކަނޑައެޅުމަށްފަހު އެވެ.
މިފަދަ މައްސަލަތަކުގައި މުޖުތަމައުގެ އަހްލާގީ މިންގަޑު ހިފެހެއްޓުމުގެ ގޮތުން މި ދެމީހުންގެ މައްޗަށް އިއްވި ހުކުމުގެ ތަފްސީލީ ރިޕޯޓް ކޯޓުން ކޮށްފައެއް ނުވެއެވެ.
