ބަދަލުގެ ގޮތުގައި މި އަހަރު އެކި ފަރާތްތަކަށް 373 މިލިއަން ރުފިޔާ ދީފައިވޭ
ސަރުކާރުން ބަދަލުގެ ގޮތުގައި މި އަހަރު އެކި ފަރާތްތަކަށް 373 މިލިއަން ރުފިޔާ ދީފައިވާ ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
އެގޮތުން ފިނޭންސް މިނިސްޓްރީގެ އެންމެ ފަހުގެ ތަފާސް ހިސާބު ތަކުން ދައްކާގޮތުގައި މި މަހުގެ 12 ވަނަ ދުވަހުގެ ނިޔަލަށް ބަދަލުގެ ގޮތުގައި ސަރުކާރުން ވަނީ 373.8 މިލިއަން ރުފިޔާ ހޭދަކޮށްފައެވެ.
ނަމަވެސް ބަދަލުދިނުމަށް ޚަރަދުވާނެ ކަމަށް ލަފާކޮށް މި އަހަރުގެ ބަޖެޓުގައި ކަނޑައަޅާފައި ވަނީ 101.2 މިލިއަން ރުފިޔާއެވެ.
އެހެން ކަމުން ބަޖެޓު ކުރި އަދަދަށްވުރެ އިތުރަށް 272.6 މިލިއަން ރުފިޔާ މި އަހަރުގެ މިހާތަނަށް ސަރުކާރުން އެކި ފަރާތްތަކަށް ދީފައިވާ ކަމަށް ފިނޭންސްގެ ތަފާސް ހިސާބުތަކުން ދައްކައެވެ.
ބަޖެޓު ކުރި އަދަދަށްވުރެ އިތުރަށް ސަރުކާރުން އެކި ފަރާތްތަކަށް ބަދަލު ދީފައިވާ ކަމަށް ފިނޭންސްގެ ތަފާސް ހިސާބުތަކުން ދައްކާއިރު ރާއްޖޭގެ ޤާނޫނު އަސާސީއާއި މާލިއްޔަތު ޤާނޫނުގައިވާ ގޮތުން ދައުލަތުން ޚަރަދުތައް ކުރަންޖެހޭނީ ބަޖެޓުގައި ޖަހައި ފާސްކޮށްފައިވާ އަދަދުތަކާ އެއްގޮތްވާ ގޮތުންނެވެ.
