މުޢިއްޒުގެ ވަޢުދުފުޅުތައް ފަސް އަހަރުގެ ތެރޭގައި ފުއްދަވައިދެއްވާނެ: މުފީދު
އިންތިޚާބީ ރައީސް ޑރ.މުޙައްމަދު މުޢިއްޒު ވެވަޑައިގެންނެވި ވަޢުދުފުޅުތައް ފަސް އަހަރުގެ ތެރޭގައި ފުއްދަވާނެ ކަމަށް ރައްޔިތުންގެ މަޖިލީހުގެ ށ.މިލަންދޫ ދާއިރާގެ ކުރީގެ މެމްބަރު ހަސަން މުފީދު ވިދާޅުވެއްޖެއެވެ.
ސަންގު ޓީވީގެ "2023ގެ ރައީސް" ޓޯކް ޝޯގައި ވާހަކަ ދައްކަވަމުން ހަސަން މުފީދު ވިދާޅުވީ، ބޯހިޔާވަހިކަމާއި މަސްވެރިކަމުގެ ދާއިރާއަށް ބެލި ކަމުގައި ވިޔަސް، ރައީސް އިބްރާހީމް މުޙައްމަދު ޞާލިޙުގެ ސަރުކާރުން ވެވަޑައިގެންނެވި ވަޢުދުތައް ތަންފީޒު ވެގެން ދިޔަ ތަން، މި ފަސް އަހަރުގެ ތެރޭގައި ރައްޔިތުންނަށް ފެނިފައި ނެތް ކަމަށެވެ.
ނަމަވެސް އިންތިޚާބީ ރައީސްގެ ފަރާތްޕުޅުން ރައްޔިތުންނަށް އުއްމީދު ލިބެމުންދާކަން ފާހަގަކުރައްވައި އޭނާ ވިދާޅުވީ، މުޢިއްޒުގެ ވަޢުދުފުޅުތަކުގެ ތެރެއިން، އެންމެ ފާހަގަކޮށްލެވޭ ވަޢުދުފުޅެއްގެ ގޮތުގައި ފާހަގަކުރެވެނީ 3000 ހައުސިން ޔުނިޓު ހަމައެކަނި ޒުވާނުންނަށް ޚާއްޞަ ކުރެއްވުން ކަމުގައެވެ.
"މިއީ ހާދަ ބޮޑު އަދަދެކޭ. އަދި އެކަނިވެރި މައިންނާއި ބަފައިންނަށް، 1،000 އެޕާޓްމަންޓް ހިމެނުން."
ވެރިކަމުގެ ފަސް އަހަރުގެ ތެރޭގައި، 65،000 ހައުސިން ޔުނިޓު އަޅުއްވަން މުޢިއްޒު ވަޢުދުވެވަޑައިގެންނެވީ ވަރަށް މާތް މަޤްޞަދެއްގައި ކަމަށް ވިދާޅުވެ، ެއެކަމަށް ވެސް މުފީދު ތަޢުރީފު ކުރެއްވިއެވެ.
މުޢިއްޒުގެ މެނިފެސްޓޯގައި އެންމެ ބޮޑު އިސްކަމެއް ދީފައިވާ އެއް ކަމަކީ ގެދޮރުވެރިކަމުގެ މައްސަލަ ޙައްލު ކުރުމެވެ.
ު
