ރައީީސް ޔާމީންގެ އިސްތިއުނާފު މައްސަލައިގެ އަޑުއެހުމެއް މާދަމާ
ވ. އާރަށް މައްސަލައިގައި އިދިކޮޅު ލީޑަރު، ރައީީސް ޔާމީން ޢަބްދުލްޤައްޔޫމްގެ މައްޗަށް އިއްވައިފައިވާ 11 އަަހަރުގެ ޖަލު ޙުކުމުގެ އިސްތިއުނާފް ޝަރީއަތުގެ އަޑުއެހުމެއް މާދަމައަށް ތާވަލު ކޮށްފިއެވެ.
މި މައްސަލައިގެ އަޑުއެހުމެއް ތާވަލު ކޮށްފައި މިވަނީ އަޑުއެހުމެއް ނުބާއްވާތާ ދުވަސްތަކެއް ފަހުންނެވެ.
ހައިކޯޓުގައި ކުރިޔަށްދާ މި އަޑުއެހުން ތާވަލު ކޮށްފައިވަނީ މާދަމާ މެންދުފަހު 2:00 އަށެވެ. މި މައްސަލާގައި އެންމެ ފަހުން ބާއްވަން ތާވަލްކުރި އަޑުއެހުންވެސް ވަނީ ކެންސަލް ކޮށްފައެވެ.
މާދަމާގެ އަޑުއެހުމުގައި އޮންނާނީ، އެންމެ ފަހުގެ އަޑުއެހުމުގައި ރައީސް ޔާމީންގެ ފަރާތުން ދެއްކެވި ވާހަކަތަކަށް ދައުލަތުން ޖަވާބުދާރީވުމެވެ.
އެންމެފަހުން އޮތް ޝަރީއަތުގެ އަޑުއެހުމުގައި ރައީސް ޔާމީން ވަނީ އާރަށް ކުއްޔަށް ހޯއްދަވަން، ފެލިދޫ ދާއިރާގެ މެންބަރު ޔޫސުފް ނައީމް އުޅުއްވިކަން ކުރިން އެނގިވަޑައިނުގަންނަވާ ކަމަށް ވިދާޅުވެފައެވެ. ރަށްތަކާއި ފަޅުތައް ލިބެނީ ކޮންބަޔަކަށްތޯ ރައީސް އޮފީހުން ނުބަލާ ކަމަށް ވެސް އެ އަޑުއެހުމުގައި ރައީީސް ޔާމީން ވިދާޅުވިއެވެ.
ރައީސް ޔާމީންގެ މައްޗަށް އިއްވި 11 އަހަރުގެ ޖަލު ޙުކުމާއިއެކުގައި، އެމަނިކުފާނު ފަސް މިލިއަން ޑޮލަރުގެ ޖޫރިމަނާ ދެއްކުމަށް ވެސް ކްރިމިނަލް ކޯޓުން ޙުކުމްކޮށްފައެވެ.
