ހަމަލާ ދޭތީ، ދެ ދުވަސްތެރޭގައި ލައްކައަކަށްވުރެ ގިނަ މީހުން ޣައްޒާގެ އުތުރު ދޫކޮށް ގޮސްފި
ފަލަސްޠީނުގެ ޣައްޒާއަށް އެއްގަމު މަގުންނާއި ވައިގެ މަގުން، ޔަހޫދީ ދައުލަތުން ސްޕޮންސަރ ކޮށްގެން، ޔަހޫދީ ސިފައިން ދެމުން އަންނަ ހަމަލާތަކާއި އެކު، ލައްކަ އަކަށްވުރެ ގިނަ މީހުން ޣައްޒާގެ އުތުރު ދޫކޮށް ގޮސްފިއެވެ.
އަލްޖަޒީރާ އިން ރިޕޯޓް ކުރާ ގޮތުގައި، ޣައްޒާގެ އުތުރަށް ދެމުން އަންނަ ހަމަލާތައް ވަރުގަދަ ކޮށްފައިވާއިރު، ފަލަސްޠީނުގެ ރައްޔިތުން ޣައްޒާގެ ދެކުނަށް ބަދަލު ވަނީ، ކޮންމެ ދުވަހަކު ވެސް އިޒްރޭލުން ހަމަލާ ނުދޭން ނިންމި ވަގުތުތަކުގައެވެ. އަނިޔާވެރި އިޒްރޭލުން ނިންމައިފައި ވަނީ ކޮންމެ ދުވަހަކު ވެސް ހަތަރު ގަޑިއިރަށް ހަމަލާތައް ދިނުން ހުއްޓައިލުމަށެވެ.
ނަމަވެސް އިޒްރޭލުން ދަނީ އެއްވެސް ރަޙުމެއް ނެތި، ޣައްޒާގެ ދެކުނަށް ހިޖުރަ ކުރާ މީހުންނަށް ވެސް، ދަތުރުގެ މަތީގައި ވަނިކޮށް ހަމަލާ ދީ ޝަހީދު ކުރަމުންނެވެ.
އދ އިން މި ހަފްތާގެ ކުރީކޮޅުގައި ބުނެފައިވާ ގޮތުގައި، މި ފަހަރުގެ ހަނގުރާމަ ފެށިފަހުން، ޣައްޒާގެ 2.3 މިލިއަން މީހުންގެ ތެރެއިން، 1.5 މިލިއަން މީހުން ވަނީ އަމިއްލަ ގެދޮރު ދޫކޮށް ގޮސްފައެވެ.
އެއްގަމު މަގުންނާއި ވައިގެ މަގުން އިޒްރޭލުން ދެމުން އަންނަ ހަމަލާތަކުގައި ފަލަސްޠީނުގެ 10،000އަށްވުރެ ގިނަ ރައްޔިތުން ޝަހީދުކޮށްލައިފައިވާއިރު، މިކަމުގައި އިޒްރޭލަށް އެންމެ ބޮޑަށް މަދަދުވެރި ވަނީ އެމެރިކާއާއި އިނގެރޭސިވިލާތުންނެވެ.
