މޭޔަރުކަމުގައި ހުރިއިރު، ހުއްދަ ނުދިން މަޝްރޫޢުތަައް، ދެން ބާރު މިނުގައި ކުރިއަށް ދާނެ: ރައީސުލްޖުމްހޫރިއްޔާ
މާލެ ސިޓީގެ މޭޔަރު ކަމުގައި ހުންނެވިއިރު، ހުއްދަ ނުދިން މަޝްރޫޢުތައް ދެން ކުރިއަށްދާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މާފަންނު ގަޑިބުރު ހުޅުވައިދެއްވި، މިރޭ ބޭއްވި ހަފްލާގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ ލާމަރުކަޒީ ނިޒާމުގެ ދެ ފަރާތުގައި ވެސް މަސައްކަތް ކުރެއްވުމުން، ކައުންސިލްތައް ނުހިގަނީ ކީއްވެކަން ސާފުވެވަޑައިގަތުމުން، ކައުންސިލްތައް ބާރުވެރި ކުރުވުމަށް ޚާއްސަ ވުޒާރާއެއް އުފެއްދެވީ ކަމަށެވެ.
"ދެން ފެނިގެންދާނީ، އިރާދަކުރެއްވިއްޔާ، ކައުންސިލުތައް ރައްޔިތުން އެދޭ ގޮތަށް، ބާރު ސްޕީޑުގައި ހިނގަމުންދާތަން. އެގޮތުން މާލޭގައި ވެސް އަޅުގަނޑު މޭޔަރުކަމުގައި ހުރިއިރު، ހުއްދަ ނުދިން، ރައްޔިތުން އެދިފައި ހުރި ހުރިހައި މަޝްރޫޢުއެއްވެސް ދެން ބާރު ސްޕީޑުގައި ކުރިއަށް ދާނެ." ރައީީސް މުޢިއްޒު ވިދާޅުވިއެވެ.
ރައީސް ވިދާޅުވީ މާލޭގައި ޕާކިން އިމާރާތްތައް އެޅުމަށް، އެއްބަސްވުންތަކާއި އެއްގޮތަށް އެކަން ކުރުމުގެ ފުރުޞަތު ސަރުކާރުން ދޭނެ ކަމަށެވެ. އޭގެ ސަބަބުން މާލޭގެ އެކި ސަރަޙައްދު ތަކުގައި މަލްޓި ސްޓޯރީ ނުވަތަ މަލްޓި ޔޫސް ޕާކިން އިމާރާތްތައް އެޅިގެންދާނެ ކަމަށާއި، އެކަމުގެ ސަބަބުން މިހާރު މަގުތަކުގައި އޮތް ތޮއްޖެހުމަށް ލުއިތަކެއް އަންނާނެ ކަމަށެވެ.
ރައީީސް މުޢިއްޒު އިތުރަށް ވިދާޅުވީ، ހުއްޓިފައިވާ މާލޭގެ މަގުތައް ހެދުމުގެ މަޝްރޫޢު ވެސް ދެން ފެށިގެންދާނެ ކަމަށެވެ. މި މަޝްރޫޢުގެ ބޮޑުކަން ފާހަގަކުރައްވައި، މިކަމަށް ބޭރުގެ އެހީތެރިކަން ހޯޯއްދެވުމަށް ވިސްނަވާ ކަމުގައި ވެސް ރައީީސް މުޢިއްޒު ވިދާޅުވިއެވެ.
ޒަމާނީ ބަދަލުތަކާއިއެކު އަލުން ގަޑިބުރު މަރާމާތުކޮށް ހުޅުވުމުގެ މަސައްކަތް ކުރީ ރަޝީދު ކާޕެންޓްރީ އެންޑް ކޮންސްޓްރަކްޝަންސް (އާރްސީސީ) ގެ ސީއެސްއާރު ޕްރޮޖެކްޓެއްގެ ދަށުންނެވެ.
މި ގަޑިބުރު ހުންނަނީ ފަރީދީ މަގާއި އޯކިޑު މަގާއި އަދި ފުނަ މަގު ގުޅޭ ހަތަރު އަނގޮޅި ކަންމަތީގައެވެ. އެންމެ ފުރަތަމަ މިގަޑިބުރު އިމާރާތްކުރީ 1990ގައެވެ. އޭރު އެކަމަށް އެހީވީ ސްރީލަންކާ ސަރުކާރެވެ.
އަލުން ގަޑިބުރު އިމާރާތް ކުރީ ކުރީގެ ގަޑިބުރު އަސްލަކަށް ބަލައިގެން ނަމަވެސް ޒަމާނީ ގޮތަކަށެވެ. މި ގަޑިބުރުން ފަސް ވަގުތު ބަންގިވެސް ގޮވާނެއެވެ.
