ހިލޭ ކާޑުގެ ބާވަތްތައް ފޯރުކޮށްދިނުމުގެ ޕްރޮގްރާމް ފުޅާކުރުމަށް އިންޑިއާއިން 141 ބިލިއަން ޑޮލަރަށްވުރެ ގިނަ ޑޮލަރު ޚަރަދުކުރަނީ
ހިލޭ ކާޑުގެ ބާވަތްތައް ކުރިއަށް އޮތް ފަސް އަހަރަށް ފުޅާކުރުމަށް އިންޑިއާއިން 11.8 ޓްރިލިއަން ރުޕީސް (141.63 ބިލިއަން ޑޮލަރު) ޚަރަދުކުރާނެ ކަމަށް ފެޑެރަލް މިނިސްޓަރަކު ވިދާޅުވެއްޖެ އެވެ.
މި ސްކީމަކީ 813.5 މިލިއަން މީހުންނަށް ކާބޯތަކެއްޗާއި ނިއުޓްރިޝަންގެ ރައްކާތެރިކަން ކަށަވަރުކުރުމުގެ މަގްސަދުގައި ކުރިއަށް ގެންދާ ސްކީމެއް ކަމަށް ފެޑެރަލް ކެބިނެޓް ގެ ބައްދަލުވުމަށް ފަހު ނޫސްވެރިންނަށް މައުލޫމާތު ދެއްވަމުން އިންފޮމޭޝަން މިނިސްޓަރު އަނޫރާގް ތާކޫރު ވިދާޅުވި އެވެ.
އިންޑިއާގެ ބޮޑުވަޒީރު ނަރެންދުރަ މޯދީ މިދިޔަ ނޮވެމްބަރު މަހުގެ ހަތަރު ވަނަ ދުވަހު ވަނީ ޑިސެމްބަރު މަހު ނިމެން އޮތް ވެލްފެއާ ސްކީމުގެ މުއްދަތު ފަސް އަހަރަށް އިތުރު ކުރައްވާނެ ކަމަށް ވިދާޅުވެފަ އެވެ.
އަންނަ އަހަރުގެ ކުރީކޮޅު ބޭއްވުމަށް ހަމަޖެހިފައިވާ އާންމު އިންތިހާބާ ދިމާކޮށް މި އިއުލާނަށް ވަޒީރުންގެ މަޖިލީހުން ރުހުން ދީފައިވަނީ މިދިޔަ ބުދަ ދުވަހު އެވެ.
"ހިލޭ ކާޑުގެ ބާވަތްތައް ލިބުމުގެ ސަބަބުން ކާބޯތަކެތީގެ ރައްކާތެރިކަން ހަރުދަނާވެ، އާބާދީގެ ފަގީރުންނާއި ނިކަމެތި ބަޔަކަށް ދިމާވާ މާލީ ދަތިތަކަށް ލުޔެއް ލިބިގެންދާނެ،" ސަރުކާރުން ނެރުނު ބަޔާނެއްގައި ބުނެފައިވެ އެވެ.
އިކޮނޮމިކް އެފެއާޒް ސެކްރެޓަރީ އަޖޭ ސެތު ވަކިން ބޭއްވި އިވެންޓެއްގައި ވިދާޅުވީ ހިލޭ ކާޑުގެ ބާވަތްތައް ސްކީމަށް ބޮޑު ހޭދައެއް ކުރި ނަމަވެސް މި އަހަރުގެ ފިސްކަލް ޑެފިސިޓް ޓާގެޓް ހާސިލްވާނެ ކަމުގެ ޔަގީންކަން އެބައޮތް ކަމަށެވެ.
ސަރުކާރުގެ އަމާޒަކީ މާޗް މަހުގެ 31 ވަނަ ދުވަހުގެ ނިޔަލަށް ފިސްކަލް ޑެފިސިޓް ޖީޑީޕީގެ 5.9 އިންސައްތައަށް ކުޑަކުރުމެވެ.
ސެތު އިތުރަށް ވިދާޅުވީ 2025/26 ވަނަ އަހަރުގެ ނިޔަލަށް ފިސްކަލް ޑެފިސިޓް ޖީޑީޕީގެ 4.5 އިންސައްތައަށް ދަށްކުރުމަށް އިންޑިއާއިން މަސައްކަތް ކުރާ ކަމަށެވެ.
